Tsang 10 San Poi a Majaw Jawng Sara ni Hkrit Nga
March 09, 2006

Malihkrang Uma

Myen Mungdan kata kaw ya ten hta Tsang 10 san poi htai na ten ni wa sai hte maren dai san poi a majaw byin pru wa na manghkang ni hpe jawng sara ni grai hkrit nga ma ai.

Tsang 10 san poi hta jawngma ni a Awng/ Hkrat jahpan hpe yu n’na uphkang Atuya ni gaw jawng sara ni hpe jep sagawn ai lam ni a majaw, jawng sara ni hkrit nga ai rai nga ai. Tsang 10 san poi hta tinang magam gun ai jawng kawn jawngma law law awng wa yang Atsuya ni n hten wa n’na rim jep ai katut mai ai zawn, jawngma law law hkrat ai rai yang mung jawng sara ni bungli jahkring kau ya ai hte, bungli madang (position) jahkrat kau ya ai lam ni hkrum sha ma ai.

Dai majaw, anhte Buga kata na myit san-san seng-seng hte jawng sara/sarama galaw nga ai ni gaw, Tsang 10 san poi du jang grai hkrit nga ma ai. Nawku jawng hkan pyi jawngma ni a matu akyu hpyi ya na sha n ga, sara/sarama ni a matu mung akyu hpyi ya na lam akyu hpyi lamang hta shalawm wa ma ai.

N’dai hku byin ai a madung manghkang gaw sara/sarama ni shata shabrai n law ai majaw rai nga ai. Dai majaw, jawng sara n’kau mi gaw Tsang 10 san poi ten hta jawngma ni a mayun gumhpraw hkap la let jawngma ni hpe san poi gawk hta lagu yu shagun ai lam ni byin ai rai nga ai. San poi gawk sin ai sara/sarama ni hpe jawngma ni gumhpraw jawm jaw n’na lagu yu la ai ladat a majaw jawng n’kau mi hta jawngma ni san poi law law awng pru wa ma ai.

Dai sha n ga, Myen Hpyen Dap na Hpyen Du ni aya lung na rai yang madu jan ni a hpaji madang hpe yu n’na aya shalung ya ai lam ni a majaw Hpyen Du jan ni gaw Tsang 10 san poi hpe n byin-byin hkra awng na matu shakut wa ai majaw, lai wa sai shaning ni hta, MonYwa mare hkan e san poi san/htai maisau pa (Question paper) lagu mari ai manghkang ni law wa ai.

Myitkyina grup yin na jawng ni hta lahta na zawn re ai, mayun gumhpraw jaw n’na lagu yu ai lam ni nau n mu lu ai raitim, Myitkyina grup yin na jawng sara ni gaw lawu Myen mung hkan byin nga ai manghkang ni a majaw, chyalu katut sha na hpe hkrit tsang nga ai rai nga ai.

Myen mung hta tsang 10 san poi gaw jawng ma ni a prat hpe daw dan ya lu ai ahkyak ai san poi langai rai nga ai. N’dai san poi hpe shaning shagu February shata htum wa maga hte March shata praw hta galaw ma ai.