Mayan Buga Makau Grupyin hta Nga Yak
February 21, 2006

Malihkrang Uma

Jinghpaw mung Mogawng Ginwang, Mayan Buga makau grup yin nga ai mung masha ni gaw ya ten hta Bau Dum Bum lagaw kaw Myen Hpyen Asuya a Amyawk Dap langai sa jung da ai majaw grai nga yak ai lam tsun wa ma ai.

Ya akajawng sha Amyawk Dap kaba langai jung wa ai majaw, dai hkan na Hkau-na jahkut, Sun jahkut ni hpe zing la kau ya ai hta n ga, dai makau grup yin hkan dat da ai mare masha ni a Dumsu, Yam-nga ni hpe Myen hpyen la ni gap sha ai majaw, Mayan Buga kaw shanu nga ai Jinghpaw Wunpawng mung shawa yawng gaw jamjau nga ma ai lam chye lu ai.

Moi de, Yi-sun Hkau-na galaw ngut yang Dumsu, Nga ni hpe dat kau n’na n’ta kaw kashu kasha, n’ta masha ni hpe rau ngwi ngwi pyaw pyaw nga lu ai sha n ga, kaga bungli ni bai galaw let dinghku bau lu ai rai nga ai. Raitim, ya gaw lu tawn ai Dumsu, Nga langai lahkawng a majaw jamjau nga sai lam chye lu ai.

Hpyen Dap wang hpe grai ngang kang hkra kum ai lam n nga ai sha, Dumsu, Nga ni Hpyen Dap Wang ngu masat da ai shara de shangbang wa yang rim da n’na, gumhpraw Mun Manga (50,000 ks) n law htum jaw yang she bai lu shaw la ai lam tsun dan wa ma ai. Ya ten hta Dumsu langai a manu gaw n law htum Mun Sanit (70,000 ks) rai nga ai. N’kau Dumsu, Nga ni hpe gaw madu n mu yang n mu ai zawn gap sat sha kau ya ai rai nga ai.

Mayan Buga makau grup yin na mung shawa law malawng gaw Yi-sun Hkau-na galaw sha ai ni hkrai rai nga ai. Mayan Buga kata e moi de Shanglawt majan prat hta Myen Hpyen Dap langai jung da ai shara rai n’na, Ceasefire aten hta dawm kau ai rai nga ai. Dai majaw, moi shawng shawng e Hpyen dap jung ai shaloi zing kau ya ai lamu ga ni hpe bai madu la let, Yi-Sun, Hkau-na ni hpe bai jahting let galaw sha nga ai gaw 7, 8 ning daram du sai rai nga ai.