Yangon Ramma ni KIO hte Hkrum
February 14, 2006

Uma Brang/ Yangon

Yangon mare nga Jinghpaw Wunpawng ramma marai 30 jan gaw Yangon kaw du nga ai Wunpawng Mungdan Shanglawt Hpung, KIO, salang ni hte February 12 ya hta hkrum shaga ma ai hpe chye lu ai.

N’dai lamang gaw KIO hte mungchying sha ni a lapran hta grau n’na chye na hkat wa na matu hte shawng lam hta rau ta gindun sa wa lu na matu galaw ai rai nga ai. Shanglawm ai ramma ni gaw Yagon Jinghpaw Laili Laika hte Htunghking Hpung, Yangon JLH hte Yangon mare kaw shanu let laika hpaji sharin la nga ai ramma rai nga ai.

Lamang hta, ramma ni chye mayu ai lam ni hpe KIO salang ni rai nga ai Du Kumhtat Hting Nan, Du Wawhkyung Sinwa hte Du Maran Tawng La ni hku n’na htai dan ai hpe chye lu ai. Madung tsun jahta hkat ai lam gaw Myen Hpyen Du ni woi galaw nga ai National Convention hte seng n’na KIO a magam bungli, shajin nga ai lam, myit mada nga ai lam hte amyu sha ni gara hku shang tsap wa na nga ai lam ni rai nga ai.

Yangon du nga ai KIO salang ni gaw 2005 ning December kawn 2006 ning January shata laman galaw ai National Convention hta shang lawm ai ni rai nga ai.

Ramma hte KIO Salang ni gaw Yangon mare Bahan lawk na Du Ara La a moi na dum n’ta hta hkrum ma ai rai nga ai. Hkrum shaga hpawng sa du lung ai ramma ni hpe htaw-wa-htaw-sa hte lu sha ni hpe KIO kawn lajang ya ai rai nga ai.