SSA-North hpe Myen Hpyen Dap Shang Gap
February 12, 2006

The Kachin Post

Sam mung dingdung na gap hkat jahkring hpung langai rai nga ai Shan State Army-North, SSA-North, hpe February shata 10 shani hta Myen Hpyen Dap kawn shang gap ai lam, Radio Free Asia shiga hku chye lu ai.

Loi Hein ginwang, Muang Khe mare kaw ginjaw rung jung da ai SSA-North a Dap Ba 3 hpe Myen Hpyen Dap a dap dung langai kawn minute 15 daram shang gap ai rai n’na SSA-North hku n’na hpa mung bai gap ninghtang dat ai lam n nga ai hpe chye lu ai.

Myen Hpyen Dap gaw SSA-North Dap Ba 3 na ningbaw ni zuphpawng galaw nga ai aten shang gap ai rai nga ai. SSA-North Dap Ba 3 gaw moi de Sam mung Thi Baw ginwang hta ginjaw jung ai raitim, maning kawn Myen Hpyen Dap a matsun hte maren Loi Hein ginwang de htawt si ra mat ai rai nga ai.

Matut n’na mung, Myen Hpyen Dap gaw Sam mung na United Wa State Army, UWSA, ginra makau hkan mung hpyen n’gun grau shagreng jahkrat da ai rai nga ai. Myen Hpyen Dap gaw laiwa sai shaning kawn amyu sha gap hkat jahkring lang hpung ni hpe lak nak jahkrat shagun ai lam, jahkrit shagyeng ai lam, hpaga yumga galaw na ahkaw ahkang ni hpe pat shingdang ai lam hte gap hkata jahkring hpung ni ningbaw ni hpe n gawn n sawn di tsun shaga ai lam ni hpe dingyang galaw nga ai rai nga ai.

N’dai laman hta Wunpawng Mungdang Shawnglawt Hpung, KIO, a Muse ninghtawn rung dung ai Sam mung Nam Ngu mare hte grup yin mare hkan na mare masha ni kaw na N’gu hte Mam ni hpe maja zing la nga ai lam, Yi-Sun-Hkau Na galaw na matu mung jep sagawn ai lam ni grai nga ai majaw mare masha ni nga yak nga ai lam, mare masha langai hku chye lu ai.

KIO muse ninghtawn rung na magam gun marai 5 hpe Myen Hpyen Dap kawn 2006 ning January shata 2 ya hta gap sat kau n’an, mang ni hpe mung nat shamat kau sai rai nga ai.