Myen Hpyen hpe Adawt Ra; AKSYU Tsun February 06, 2006
Brang Di/ Chiang Mai
Wunpawng Jawngma hte Ramma Hpung, AKSYU, gaw anhte Buga simsa lam lu na matu Myen Hpyen hpe simsa rawtmalan ladat hte matut ninghkap sa ra ai lam 45 ning hpring masat rawtmalan ninghtoi hta tsun wa ai.
“Anhte AKSYU hpung ni, anhte ginra Buga hta Myen Hpyen a npu e Shinggyim ahkaw ahkang hkrat sum nga ai lam hpe Mungdan shara shagu de du n’na, simsa rawtmalan ladat lang let anhte Buga hta simsa wa ai ten du hkra Myen Hpyen hpe adawt sa wa ra na re,” nga n’na AKSYU ningbaw malai Leonard rawtmalan mungga hta tsun wa ai.
AKSYU hku n’na shawng ningnan lang woi galaw ai n’dai rawtmalan poi hpe Thai mung Chiang Mai mare kaw galaw ai rai n’na, Myen mung na kaga amyu sha rawtmalan hpung ni mung shanglawm ma ai rai nga ai.
Myen Hpyen Atsuya hte Wunpawng Mungdan Shanglawt Hpung, KIO, ni gap hkat jahkring ai hpang Jinghpaw Mung kata hta Sut masa, Nga pra hkawm sa asak hkrum lam hte Hkam kaja lam ni lani hte lani grau grau yak hkak hkrat sum wa ai sha n ga, lai wa sai 2006 ning January 2 ya hta hkrat sum mat ai Myu tsaw hpyen la marai 5 a mabyin ni hpe Mungkan de htawn madun lu na matu madung dat let n’dai rawtmalan poi hpe galaw ai re lam, Leonard tsun wa ai.
Myen Hpyen Atsuya laja lana uphkang ai majaw anhte amyusha ni jamjau hkrum nga ai manghkang hpe anhte myitrum ramma ni hte Buga nga mung chyingsha yawng ta gin dun let jet ai Federal Democracy ahkaw ahkang byin pru wa lu hkra shakut yang she Buga hta galai shai ai lam ni nga wa re lam, Leonard matut tsun wa ai.
Rawt Malan n’htoi hta AKSYU hku n’na n’dau shapraw ai laika pa hta; Jinghpaw Mungdaw hta Buga nga mung shawa a ahkaw ahkan nlu ai sha Myen hpyen Atsuya hku n’na ahkang jaw Hpun hkran ai lam, Ja htu ai lam n galaw na, KIO hku n’na tara rap ra ai lam n nga ai National Convention, NC, hta n lung na, 2006 January praw hta hkrat sum mat ai Shanglawt share shagan ni a mabyin gaw shinggyim ahkaw ahkang tawt lai hkrum ai lam rai n’na, tara rap ra ai hku jeyang mahtai tam ya na, Myen Hpyen Atsuya hku n’na Gap hkat jahkring ai lam hpe Mungdan ting n’dau ya na, Man Masum Hkrum Zup Hpawng (Tri-partite Dialogue) hpe lawan hkrang shapraw sa na matu shadut da ma ai.
N’dai Rawt Malan n’htoi hta Kachin Development and Networking Group, KDNG, na Slg. Steven mung, Myen Hpyen Atsuya up hkang ai ten hpang kaw n’na Jinghpaw Mungdaw hta Num kasha ni hpe Myen hpyen la ni roi rip ai lam, Nang Hpam malu masha grau grau law htam wa ai lam, Buga ginra shagu hta Ja htu, Hpun kran ai lam, tara n shang ai hpaga lam ni law htam wa tim, Buga nga amyu sha ni lani hte lani grau grau n’na mastan jamjau let ana zingli law htam wa nga ai lam hpe, tang madun wa ai.
