Rawtmalan Poi Mungkan Ting hta Galaw
February 05, 2006

The Kachin Post

Jinghpaw Wunpawng amyu sha ni a prat ningnan hta amyu sha ting shanglawt lu lam a matu rawtmalan hpang wa ai 45 ning hpring masat dingsat hpe Buga hte maigan nga anhte amyu sha ni yawng galaw ai lam chye lu ai.

1961 ning February praw 5 hta Wunpawng Mungdan Shanglawt Hpung, KIO, ningshawn let amyusha ting law lu lam a matu Myen uphkang Atsuya ni hpe ninghkap gasat wa ai hta hkrat sum mat wa sai share shagan ni yawng hpe galoi mung myit dum nga na matu hte matut n’na rawtmalan ra ai lam ni hpe myit mang let galaw ai lam rai nga ai.

Dai ning na rawtmalan poi hpe KIO hku n’na Jinghpaw mung Laiza mare kaw Sinpraw Majoi Manau poi hte rau jawm galaw ai rai nga ai. Dai poi hta KIO a ahkyak dik ai Share Munu Ja Dazik hpe Du Kaba Lamung Tu Jai hpe shagrau n’na, Magam gun ladaw 40, 30, 20 hte 10 ning hpring ai magam gun ni hpe mung shagrau lekmat jaw ma ai.

Myen mung Yangon mare na hta mung rawtmalan poi kaba hku n raitim, rawtmalan masat dingsat akyu hpyi poi langai galaw ai lam chye lu ai. Dai hta Yangon kaw du nga ai KIO Tingnyang Up malai II Dr Tu Ja, Rev Saboi Jum hte KIO salang n’kau shang lawm ai rai nga ai.

Maigan de du nga ai Wunpawng amyusha ni mung, America, Japan, England, Malaysia, India hte Thailand mungdan ni hta mung 45 ning hpring rawtmalan masat dingsat hpe galaw ai lam chye lu ai.

America kaw gaw California hte Florida kaw rawtmalan poi shara lahkawng galaw ai rai n’na, California na poi hpe Wunpawng Daini Hpung hku lit la galaw law let, Florida na poi hpe Jinghpaw Wunpawng Amyu Sharawt Hpung America lit hkam ni woi galaw ai lam chye lu ai.

London mare na rawtmalan poi hpe gaw Jinghpaw Wunpawng Amyusha Hpung, KNO, kawn lit la galaw ai zawn Thai mung Chiang Mai mare na rawtmalan poi hpe gaw All Kachin Student and Youth Union kawn woi galaw ai rai nga ai.

Dai ning na 45 ning hpring rawtmalan poi gaw kaga shaning hkan galaw ai poi ni hta lak lai ai, anhte amyusha ni grau shang lawm wa ai poi langai rai nga ai.