L. Seng Zi Korea kaw Yungwi Shapyaw The Kachin Post / December 29, 2006
Myen mung hta mying gumhkawng nga ai Wunpawng yungwi shayi L. Seng Zi gaw Korea mungdan kaw Yungwi shapyaw na matu du nga sai lam, shi hte ni nawn ai ni kawn chye lu ai.
L. Seng Zi hte rau Korea de shangwi shapyaw na yungwi hpung hta hta Rebecca Win, L. Lung Wa, Yuzana, Shin Phone, Alex, Chit Kaung hte Graham ni mung rau rai na lam chye lu ai. N’dai yungwi hpung gaw December 26 ya hta Myen mung kawn rawt mat sai rai n’na, shanhte a Yungwi pinra hpe Korea mung Seoul mare hta galaw na re lam chye lu ai.
L. Seng Zi gaw 2005 ning hta shapraw ai Maung-Doe-Cherry-Myay ngu ai Album hte mying gumhkawng wa ai rai n’na, Yangon City FM na Yin-Hkone-Than FM lamang hta shata 10 tup madat paw dik htum ai mahkawn langai hpe mahkawn da ai yungwi shayi langai mung rai nga ai.
2004 ning kawn yungwi ginra de shang wa ai L. Seng Zi gaw tinang hkrai ka shalat ai mahkawn buk 50 jan hte mahkawn album 15 hta shang mahkawn wa sai rai nga ai. Nau n’na ai ten hta mung L. Seng Zi a yungwi album ningnan pru na re lam hte, dai album hta shi nan ka shalat ai mahkawn buk 7 lawm na rai n’na, K-A-T, Mg Mg Zaw Lat, San Pyi, Shwe Gyaw Gyaw ni a mahkawn ni mung lawm na lam chye lu ai.
