Myen Hpyen Dap Hpyen Shakyang Hkyen
The Kachin Post / December 13, 2006

Myen hpyen dap kawn nau n’na ai aten hta Jinghpaw mung dingdung maga hta hpyen shakyang hkyen nga ai lam, Myen hpyen dap hte ni nawn ai shiga hku chye lu ai.

Du na December 14 kawn 22 ya du hkra yawng 8 ya tup New Democratic Army-Kachin, NDA-K, a uphkang ginra Sama hte Miwa mung ga jarit makau hta hypen shakyang na rai nga ai. N’dai masing hpe Lahta Myen mung na Sa-Ka-Hka 3 n-pu na dap dung 12 hte lak nak kaba dap 2 mung shang lawm na lam chye lu ai. N’dai hpyen shakyang na masing hta lak nak kaba 120mm, 105mm hte 76mm ni mung lawm ai lam, na lu ai.

N’dai hpyen shakyang ai masing ngut yang Karen mung de na Sa-Ka-Hka 21 hte shara galai n’na, Karen National Union, KNU, hpe gasat na matu re lam, Myen hpyen dap a shamu shamawt nga ai lam hpe sin yu nga ai Miwa mung jarit na salang langai tsun ai. Myen hpyen dap a shamu shamawt ai lam ni gaw mung masa lam hte grai matut manoi nga ai re majaw, National Convention ngut yang gap hkat jahkring hpung ni yawng hpe lak nak dawm kau ya na gaw teng wa na re lam, shi matut tsun ai.

Myen mung rawtmalan prat ja ja tsap n’na Myen hpyen dap hpe ninghkap nga ai KNU hpe shawng shamyit kau yang she Myen mung ting na rawtmalan ni hpe shazim kau lu na re ngu Myen hpyen du ni kam nga ai hpe sawn lu ai lam, hpyen masa sin yu nga ai salang wa tsun ai. Dai re majaw n’dai zawn re hpyen shakyang ai lam ni galaw hpang wa ai rai n’na, National Convention garai n ngut shi ai shaloi pyi shamyit ra ai lam ni hpe shamyit na masa nga ai lam, shi matut tsun ai.