Sinbo Makau Nga Jinghpaw ni Jam Jau
The Kachin Post / December 09, 2006

Jinghpaw mung Sinbo ginwang na Jinghpaw mare langai hpe Myen hpyen dap kawn atik anang htawt sit shangun nga ai majaw dai mare na mare masha ni jam jau nga ai lam, mare masha ni kawn chye lu ai.

N’dai mare hpe December shata praw kawn Myen hpyne dap dung langai jung na matu htawt sit shangun wa ai rai n’na, dai mare masha ni hpe mung mare kaw nga n mai hkra hkinjang jaw nga ai lam chye lu ai.

“Anhte hpa galaw sha ra na n chye mat sai, Hpa Kant de mung anhte Jinghpaw ni a Lung Seng ni hpe hkrai hkan rim nga ai,” ngu Sinbo-Tar Law Gyi makau hkan Ri shaw sha nga ai Jinghpaw mare masha langai tsun ai. Myen hpyen dap kawn Jinghpaw ni Ri shaw, Hpun-Kawa kran ai hpe pat hkum nga tim, Myen amyu sha ni hpe gaw ahkang jaw da ai lam, shi matut tsun dan ai.

Jinghpaw mare htawt sit na hpe jahkring ya na matu amyu myu Myen hpyen dap hpe tawng ban tim n lu ai lam, dai mare na salang langai tsun ai. Lahta na matsun hte maren galaw ai re ngu sha Myen hpyen dap kawn tsun ai lam, chye lu ai. “Anhte kadai hpe garum hpyi na n chye mat sai,” ngu Jinghpaw salang wa tsun ai.