Jinghpaw Mung hta Hpun Kran Shaw na Yak
The Kachin Post / December 06, 2006

Jinghpaw mung na Hpun maling ni hpe shaw dut sha na ahkang hpe Myen hpyen dap kawn atsawm sha tek jum wa sai majaw, Hpun hpaga hpe shamyet n’na galaw sha nga ai ni hkra machyi wa nga sai lam, ni nawn ai shiga lawk hku chye lu ai.

Ya ten hta Jinghpaw mung ting na Hpung kran shaw ai lam ni hpe Myen hpyen dap kawn jahkring tawn ai majaw, moi na zawn wang lu wang lang Miwa mung de hpun shalai ai lma ni zim wa ai hpe, Laiza mare na Hpun hpaga la langai tsun ai.

Shi matut tsun ai hta, moi de Jinghpaw mung na Hpun ni hpe kran shaw na matu Wunpawng Mungdan Shanglawt Hpung, KIO, kawn ahkang hpyi n’na galawa mai tim, ya gaw Myen hpyen dap kawn yawng tek jum kau sai lam chye lu ai.

Moi de Hpun htaw shalai na matu Myen hpyne dap gate ni hpe gumhpraw jaw n’na mai shalai tim, ya gaw tsep kawp n mai shalai mat sai, dai Hpun hpaga la wa tsun ai. Dai re majaw moi de KIO kawn jahkrat ya ai Hpung lawk ni kaw na mung Hpun shaw na yak mat sai lam chye lu ai.

Gara hku myi raitim, KIO hku n’na laika sharing jawng, nawku jawng gap na ngu jahpai n’na Hpun ni hpe ladat amyu myi hku shaw nga ai lam, Hpun hpaga la wa tsun ai. Ya ten hta Hpun kran shaw lu na matu, ga shadawn, jawng gap na rai yang, dai mare salang wa a madi shadaw laika, jawng gap na Engineer a madi shadaw laika, de hpang dai mare ginwang uphkang salang wa a madi shadaw laika, ngut na mungdaw uphkang salang wa a madi shadaw lai ni hpe Jinghpaw mung Tai Mu Ohn Myit hpang de shawng tang madun n’na, shi kawn ahkang jaw yang she Hpun mai shaw ai lam chye lu ai.