Myitkyina kaw Myihprap Wan Shani Shana Lu
The Kachin Post / December 01, 2006

Jinghpaw mung Myitkyina mare hta November 29 ya shana kawn hking hkum 24 tup myihprap wan lu nga sai lam, Myitkyina shiga lawk kawn chye lu ai.

Myitkyina mare de jaw nga ai myihprap wan gaw Myitkyina mare a Sinpraw Dingdung maga deng 40 daram tsan ai Ja Hta shara kawn gaw de tawn ai Mali Hka wan jak kawn jaw nga ai rai nga ai. N’dai wan jak hpe Wunpawng Mungdan Shanglawt Hpung, KIO, madu ai rai n’na, laiwa wa sai July shata 10 ya kawn Myitkyina mare de myihprap wan jaw hpang wa sai rai nga ai.

Myithprap wan shani shan lu ai majaw mare masha law malawng kabu nga ai lam chye lu ai. “Wan n’gun mung hpring hkra sa ai,” ngu wan lu ai n’ta na mare masha langai tsun ai. Ja Hta Mali Hka wan jak kawn mare na Meter Box lu ai n’ta shagu hpe jaw nga ai lam chye lu ai.

Myitkyina mare gaw laiwa sai May shata htum hta Chyinghkrang Hka wan jak mawru hta lawm mat ai kawn myihprap wan tsep kawp n lu mat ai rai nga ai. De hpang Ja Hta wan jak kawn July shata praw hta shana shagu wan bai jaw ai majaw myihprap wan bai lu lang wa ai rai nga ai.

Ja Hta Mali Hka wan jak gaw 10.5 Mega Watt n’gun nga ai Hka n’gun lang wan jak langai rai nga ai. N’dai wan jak hpe US dollar sen 90 daram ma hkam n’na 2003 ning January shata kawn gaw gap hpang wa ai rai nga ai.