Danai Lam na Mare hta Mawru Byin
August 25, 2006

Uma Brang

Jinghpaw Mung Lido Lam (Danai de sa ai lam) na Bankok ngu ai mare kaw August 20 ya shana hta mawru kaba byin ai lam, mare masha ni kawn chye lu ai.

Mawru gaw Laban shana hkying 8:00 daram hta byin ai rai n’na, n’ta 12 agrawp mat ai hte ramma langai hkala hkrum ai lam na lu ai. Bankok mare hta n’ta htinggaw 20 daram nga ai kaw na n’ta 12 mawru hta lawm mat ai majaw mare tswam ra mi hten za mat ai hpe chye lu ai.

Bankok mare gaw Jahtu Zup hte Wara Zup mare lapran na mare ningnan kasha langai rai nga ai. N’dai mare gaw moi Shanglawt majan prat hta hten mat ai mare kaba langai rai n’na, 1996 ning hkan she masha bai nga hpawng wa ai mare kasha langai rai nga ai.