Yangon na Ramma Hkaw Tsun Hpawng Pat Hkrum
August 21, 2006

Uma Brang

Yangon mare na Jinghpaw Wunpawng Hkalup Hpung Nawku Jawng hta galaw na hkyen lajawng da ai ‘Ramma hte Tsa Ban 21’ ngu ai hkaw tsun hpawng hpe Myen Hpyen Atusya hku n’na galaw na shani hta nan pat kau ya ma ai.

‘Tsa Ban 21’ hkaw tsun hpawng hpe August 19 ya kaw galaw na shateng da ai rai n’na, dai hpawng hta Myen mung na mying kaba ai laika ka sara Ko Tar hte sara Chit Oo Nyo yen ramma ni hpe hkaw tsun na hpawng rai nga ai.

N’dai hkaw tsun hpawng hpe Yangon Jinghpaw Wunpawng Hkalup Hpung Nawku jawng kaw na Ramma Dap kawn woi lajang ai rai n’na, dai hpawng laman hta Ko Tar hte sara Chit Oo Nyo ni hpe saw shaga let ramma ni hpe n’gun jaw na lamang rai nga ai.

Hkaw tsun hpawng hpa majaw pat kau ya ai lam hpe hkrak n chye lu tim, Ko Tar hte Chyit Oo Nyo ni gaw Myen mung kaw mying kaba ai laika ka sara kaba ni rai ma ai. Hkaw Tsun hpawng hta Ko Tar gaw ‘Kaga Shara kawn Dinglun Ra ai Lam’ hte Chit Oo Nyo gaw ‘Ramma hte Tsa Ban 21’ ngu ai ga baw ni hte ramma ni hpe hkaw tsun na matu lajang da ai rai nga ai.

Du sa ai Myitsu ni, ramma kaji kaba ni gaw grai myit mada n’na sa du ai raitim, hkaw tsun hpawng hten mat ai majaw, grai myit n pyaw let wa ra ai hpe chye lu ai. Yangon nga ramma law malawng gaw, n’dai hkaw tsun hpawng hta mying kaba ai laika ka sara ni hku n’na Myen Hpyen Atsuya hpe n kaja ai hku jahpyak na, dinglun na hpe tsang ai majaw pat kau ya ai re lam, chye na nga ma ai.