Sumpra Bum Lam Makau na N’ta N’kau Run Shangun
August 14, 2006

Mali Pan Tsun

Myintkyina mare na Sumpra Bum Lam hpe dawng 150 dam ai Lam galaw na majaw, Pa La Na lawk na Lam makau hte ni ai n’ta ni yawng hpe run shangun nga ai lam, mare masha ni tsun ma ai.

Pa La Na lawk na Sumpra Bum Lam makau nga n’ta ni hpe dawng mi sha hkra tim n’ta hpe run shangun n’na, n’ta wang manu mung n jaw ai sha zing la nga ai lam chye lu ai. N’dai zawn run hkrum ai n’ta jahpan hpe hkrak n chye lu tim, n’ta ningnan ning mung run shangun ai kaw lawm ai lam chye lu ai.

Sumpra Bum Lam gaw Myitkyina mare hte Sumpra Bum mare hpe matu da ai deng 100 jan galu ai lam n maw kaba rai nga ai. Sumpra Bum lam dam ai hku waw ai magam hpe shawng de Jand Land Myanmar Co., Ltd kawn lit la galaw wa sai raitim, Myen uphkang ai ni hku n’na lit la galaw nga ai rai nga ai.

Ya ten hta Myitkyina mare ka-ang hte ni ai Sumpra Bum Lam makau na n’ta manu ni mung Lam n’maw kaba wa ai hte maren manu grai rawt wa ai aten mung rai nga ai. Myen uphkang ai ni hku n’na run shangun ai n’ta madu ni gaw grai myit n pyaw let, jam jau nga ma ai lam chye lu ai.