Kachin Student Fellowship a Hkaw Tsun Hpawng Galaw
August 10, 2006

Uma Brang

Myanmar Institute of Theology (MIT) jawng na Kachin Students Fellowship a laili laika komiti kaw na ‘Prat Masa hte Anhte a Maka’ nga ai gabaw hte August 5 ya shani hta Yangon Jinghpaw Hkalup Hpung (YJH) nawku jawng kaw galaw ma ai.

Hkaw tsun hpawng lamang hta Sara Zahkung Hkun Sa hku n’na ‘J.W Amyu sha ni a Htunghking hte Hkristu a Kabu Gara Shiga’ nga ai gabaw hte Sara Lagai Zau Nan hku n’na ‘Prat Masa hte Anhte a Maka’ nga ai gabaw ni hte woi awn ai zawn, Sara Hkindu Zau Ja hku n’na mahkawn sharin ya ai lam ni hpe galaw ma ai. Marai 140 jan sa du madat lawm ai hpe chye lu ai.

Sara Zahkung Hkun Sa tsun lai wa ai lam ni hta, htunghking hte makam masham gaw kaga ga n rai ai lam, moi nat hpe nawku ai ten hta jai lang ai a kyu jashawn ai lam ni hpe ya dai ni na Hkristu hpe kam sham wa ai ten hta shai hkat ai, gang hkat ai lam ni hpe gara hku lahkri shawn akyu rawng hkra jai lang na lam ni hpe tsun dan ai. Matut n’na dai ni na prat zawn grai lawan n’na galu kaba nga ai ten hta prat hpe shachyut nga ai ramma ni a matu htunghking lam hpe grau chye na na matu lam hpaw lam madun ra ai lam ni hpe madung tawn ra ai hte htunghking hpe Hkristu hta galai shai ra sai lam ni hpe kahtap n’na tsun shana mat wa ai.

Sara Lagai Zau Nan gaw ‘Prat Masa hte Anhte a Maka’ nga ai gabaw hte tsun shalai wa ai lam hta anhte Wunpawng sha ni a jiwoi jiwa ni gaw ban prat law law wa bumring bumga e nga pra asak hkrung lai wa sai ten hta, aten ladaw e lam woi ai hte shamu shamawt asak hkrung lai wa masai. Makau grup yin na duhkra ladaw, hpun kawa ni galai shai wa ai hte hkra-u ni a ngoi shaga ai n’sen ni hpe madat n’htawm asak hkrung shamu shamawt lai wa ma sai. Dai majaw Wunawng sha ni gaw aten ladaw a n sen chye madat ai amyu, aten ladaw hta hkan n’na galai shai asak hkrung chye ai hkri-wang hkring htawng lu ai amyu rai nga ga ai. Rai yang, dai ni na aten hta, aten ladaw gaw kaning nga ngoi gara nga a ta? Aten ladaw a ngoi gara ai n’sen hpe kaning nga na lu na nga ta? makau grup yin hkan na du hkra ladaw Hka-shi Hka-wam, hpun kawa ni kaning rai galai shai nga ma a ta? Garai shai nga ai makau grup yin gaw Wunpawng sha ni hpe hpa tsun nga a ta? nga n’na anhte a galai shai ai prat masa ni hpe mastun madun mat ai.

N’dai zawn tsun shalai wa ai hta gabaw lahkawng hpe madun tawn tsun shalai mat ai hku re. Galai shai ai prat maka hte anhte a rudi maka (where we rooted) nga gabaw lahkawng hpe Anhte myusha ni a masa, mungkan madang hte kaga gashadawn law law hte matsun madun n’na chye hkawn hkrang lu na daram tsun shalai mat wa ai hku re.

Hpung jahtum hku n’na dai ni Jinghpaw Wunpawng sha ni a asak hkrung maka hpe ‘Kata na Mabyin Masa (Internal Circumstance)’ hte ‘Shinggan de na Ningdat Hpungtun (External Challenge)’ ni hpe hkrum katut nga ai lam tsun wa ai. Globalization ngu ai dai ni na prat hta, anhte myu sha ni gaw Wa N’du myit (selfishness), Pawn sharawt hkat ai lam (build up), machye machyang e woi awn ai asak hkrung lam (knowledge oriented lifestyle) hte Myit hkrum lam (Unity) nga ai gabaw kasha ni hpe tsun jahpra sang lang myit mang shangun n’na anhte a myu sha aten maka prat byin da, galai shai ai mungkan prat masa hte rau, amyu sha ni a rudi maka hpe mazing sumhting let ngang kang grin ai amyu sha lam yan n tsa tsap let amyu sha ni a shawng lam gam maka hpe jawm gaw gap sa wa ga law nga let hpum dim dat nu ai.

Matut n’na lamang hta 2006-2007 ning na Pahtau Magazine a matu laika ngau shingjawng poi hta Chyum masa, Karai masa, Sumrai, Sumroi, Cartoon, Ga malai, Htunghkring masa, Maumwi, labau, Gashagawp hte mani hpa kadun kadaw ni hkan shingjawng numbat lu ai ni hpe mung shagrau sha a ai lam chye lu ai.