Laiza kaw Masa Lam ni Katsi Nga
April 06, 2006

Malihkrang Uma

Wunpawng Mungdan Shanglawt Hpyen Dap, KIA, ginjaw jung ai Jinghpaw mung Laiza mare hta mung masa lam amyu myu hpe hkrit tsang wa ai mung masha gaw hkawm sa ai lam taw wa ai majaw mare grupyin hkan hkan katsi katsang byin wa ai hpe mu lu ai.

Moi de hpaga yumga kaja ai majaw mung masha ni wu-wu di-di hkawm sa nga ai Laiza mare hta, laiwa sai March shata praw hta Myen hpyen dap Dingdung Ginjaw Du Kaba Ohn Myint hte hpung ni a kajawng sha Laiza mare de du shang wa ai lam, Ohn Myint hte KIA na Du Kaba N’ban La yen a tsun shaga ai lam ni hpe maram n’na, hpyen hpung lahkawng gasat gala wa na hpe myit tsang ai majaw, mung masha ni tau hkrau koi yen ai re lam, mare masha ni tsun wa ma ai.

N’dai laman, KIA a Dap Ba 1 jung ai Hkahku Bum de n’gu, lu sha hte kaga a’rung a’rai ni shalai ai lam hpe Myen hpyen dap kawn laja lana pat shingdang wa ai lam hte, moi de tara shang galaw na ahkaw ahkang lu tawn ai Shanglawt hpyen dap a buga gaw sharawt ai lam ni hpe mung jahkring da ra ai lam, Laiza mare na Shanglawt magam gun usa langai tsun dan wa ai.

“Buga Gaw sharawt bungli n nga sai nga yang gaw, majan kasat na bungli langai sha nga sai,” ngu Shanglawt magam gun usa wa tsun ai.

Myitkyina mare hkan nga ai mung masha ni mung n’dai lam ni hpe maja let myit kahpra nga ma ai. N’dai lang Shanglawt hte Myen bai gasat wa yang gaw moi na hta grau yak wan a lam hpe mung tsang nga ma ai hpe chye lu ai.

Myen hpyen dap gaw 2006 ning praw kawn, Wunpawng Mungdan Shanglawt Hpung, KIO, a shang gumhpraw lu nga ai Hpun hpaga hte kaga N’hprang sut rai htu shaw ai lam ni hpe langai hpang langai pat shigdang wa ai sha n ga, KIO a buga gaw sharawt ai lam ni hpe mung galaw na ahkang dawm kau ya wa sai rai nga ai.