Model Shingjawng Poi Myitkyina kaw Galaw Na
April 05, 2006

Uma Brang

Kcastz Modeling & Dancing Class kawn lit la let April 8 ya hta Myitkyina Majoi Manau Gawknu kaw Miss Kcastz lata shingjawng poi hpe galaw na lam chye lu ai.

N’dai Kcastz a tsawn shayi lata poi hpe Kcastz Modeling & Dancing Class hpe promotion galaw ai hte hpawn Jinghpaw ramma ni atsam kade lu shaw dan ai hpe shakut dan mayu ai majaw re lam, Kcastz kawn tsun dan ai. N’dai poi hta lu ai shang gumhpraw ni hpe gaw Myitkyina mare na Myi N mu Jawng hpe garum jaw na lam chye lu ai.

Kachin Confident Talent Society & Talent Zone, Kcastz, hpe Maran Seng Naw, Htoi Din hte San Oo ni woi hpaw hpang wa ai rai nga ai. Kcastz a shawng ningnan lang na n’dai tsawm shayi shingjawng poi hpe Kcastz hte kaga co-sponsor 12 kawn lit la galaw ai rai nga ai.

Model shingjawng poi hta asak 16 kawn 25 ning lapran na shayi sha ni shang lawm mai ai rai n’na, shingjawng poi hta No 1 lu ai shayi sha hpe Myen gumhpraw Sen 3 dan ai Diamond Crown hte Best Dress, kaga shakya ai lamang ni, arung arai ni hpe shagrau na lam chye lu ai. No 2 lu ai shayi sha hpe gaw Myen gumhpraw Sen 2 hte No 3 lung ai shayi hpe gaw Sen mi shagrau na rai nga ai.

Dai hta n ga, poi hpe sponsor galaw ai ni hku n’na mung Miss Photo Genic, Miss Popular, The Best Costume, The Best Catwalk hte Miss Eskimo ngu ai laksan shagrau kumhpa ni jaw na lam chye lu ai.

Poi lek mat ni hpe Myen Gumhpraw 7000, 5000, 3000 ni hte poi yu shara 2,000 matu dut nga ai lam chye lu ai.