Davis Cup Tennis Shingjawng Poi hta Tu Maw Shang Lawm
April 04, 2006

Uma Brang

Myen mung Tennis ginsup ai hta ningtawn htum ai Lashi Tu Maw gaw April 5-9 laman Jordan mung dan hta galaw na Davids Cup Tennis shingjawng poi matu n’dai Laban shani hta rawt sa wa sai rai nga ai.

2006 ning a Myen mung a Tennis national player No 1 re ai Tu Maw gaw Myen mung na kaga ginsup manang langai hte rau Davids Cup de shang lawm na rai nga ai.

Tu Maw gaw laiwa sai February 18-24 kaw galaw ai 2006 Myanmar Open Tennis shingjawng poi hta shi a ginsup manang Min Min hpe dang n’na, Myanmar Men’s Single Title hta No 1 lu ai rai nga ai. 2004 ning na Myanmar Open Tennis hta mung Tu Maw gaw No 1 lu da ai wa rai nga ai.

“Kaja wa myit lawm yang kaja wa shakut ra ai, hkam sharang ra ai, rang ra nga ai. Galoi mung pandung (target) tawn da ra ai,” ngu Tu Maw tsun ai.

Jinghpaw mung Wai Maw mare kaw dai daw ai Tu Maw gaw 2003 ning Davids Cup (Asian Oceanic Zone) hta shang lawm wa rai nga ai. Dai poi gaw Myen mung hku n’na Davids Cup hta shawng ningnan shanglawm ai rai nga ai.

Tu Maw gaw 2000-2001 hta Myen mung a national player position no 9 rai n’na, 2004-2005 hta gaw national player position 3 lu wa sai rai nga ai. Tu Maw gaw jawng tsang 8,9,10 laman Jinghpaw mungdaw a malai hku n’na Jawngma ginsup poi hkan shang lawm n’htawm, 1998 ning kawn Myen mung Tennis hpung hta new generation hku n’na Tennis ginsup ai hpe sharin shakat la wa sai rai nga ai.