KBC Magam Gun Ningnan Lata
April 03, 2006

Malihkrang Uma

Marai 20 jan lawm ai Jinghpaw Wunpawng Hkalup Hpung Ginjaw, KBC, a 2006-2010 ladaw matu magam ningnan hpe Jinghapaw mung Katsu buga kaw galaw ai 35 lang na KBC Hpung Shawa Zuphpawng kawn lata masat dat sai rai nga ai.

Hpung masha 10,000 jan sa du shang lawm ai 35 lang na KBC a hpung shawa zuphpawng (General Mass Meeting) hpe 2006 ning March 29 kawn April 2 ya du hkra du hkra Sama ginwang Katsu buga kaw galaw ai rai nga ai. Dai zuphpawng hta KBC Hpung Ginwang 13 kaw na kasa ni, Myen mung shara shagu de na hpung masha ni hte maigan manam n’kau mung shang lawm ai hpe chye lu ai.

N’dai hpung shawa zuphpawng kawn KBC a Ningbaw hpe Mandalay buga hpung na Rev. Kumshin Zau Awng hte Amu Madu hpe Manmaw buga hpung na Rev. Labya Paul Naw Tawng hpe lata san da sai lam chye lu ai.

Ngam nga ai KBC magam gun ningnan ni gaw, Ningtau Ningbaw I hpe Rev. Tangbau Hkawng Lum (Kuthkai), Ningtau Ningbaw II hpe Srn. Seng Hkam (Myitkyina), Ningtau Amu Madu hpe Rev. Sumlut Tang Awng (Sam Mung), Hkristan Hpaji Dap hpe Srn. Maran Nang Shan (Myitkyina), Kabu Gara shiga hte Sasana Magam Dap hpe Rev. Lahpai Ja Naw (Myitkyina), La Hpa-awn hpe Rev. Hpaugan Tang Gun (Myitkyina), Num Hpa-awn hpe Srn. Marip Bawk Mai (Myitkyina), Ramma Hpa-awn hpe Sr. N’hkum Tang Gun (Myitkyina), Hpung Sara Hpa-awn hpe Rev. Sabaw Tang Gun (Htingnai), Laili Laika Dap hpe Rev. Mading Zung Kyang (Myiktyina), Labau Kyem Dap hpe Hpt. Sayaw Pawlu (Wai Maw), Music Magam Dap hpe Rev. Maran Shan Lum (Myitkyina), Ngwipyaw Simsa Lam Tam Magam Dap hpe Rev. Zahkung Zau Shan (Myitkyina), Ningbaw Shalat Magam Dap hpe Srn. Lahtaw Ja Nan (Shalom), Karum Kahtau Magam Dap hpe Rev. Labwi Naw Bawk (Myitkyina), Karai Masa Magam Dap hpe Rev. Dr. N’gan Tang Gun (Myitkyina), Chyum Jawng Zinlum Magam Dap hpe Rev. Dr. Lahtaw Saboi Jum, Trustee hpe Rev. Hkalam Samson, hte Chyum Jawng Up hpe Rev. Dr. Saga Hkyen Naw ni hpe lit magam masat ya sai rai nga ai.

N’dai KBC magam gun ningnan ni hpe KBC a Nomination Committee kawn lai wa 2006 ning March 29 hta Dabak buga kaw galaw ai 18 Lang na KBC kasa hpawng hta tang shawn da sai rai n’na, Kasa ni kawn shalai dat ai magam gun lahta hkrum na (candidate) ni hpe Hpung Shawa kawn masat shagrin ya ra ai rai nga ai.

35 lang na KBC a hpung shawa zuphpawng hta lak lai ai lam langai gaw, lai wa sai 20 daram hta KBC kata hta manghkang byin n’na Jinghpaw Wunpawng Hkalup Hpung Dingsa hte Ningnan ngu garan hka bra nga ai hpe bai jahkrum lu na matu hpung shawa ni ra sharawng let tang shawn wa ai hpe Tingnyang Up hku n’na nau wa ahkyak n shatai ya ai majaw loili garu hpa lam byin pru wa ai hpe na lu ai.

KBC gaw Budget laning mi Sen hking mali jan hte shamu shamawt nga ai rai n’na, Chyum Hpaji madang Master of Divinity jaw lu ai Chyum Jawng langai, Bachelor of Theology jaw lu ai Chyum Jawng lahkawng nga sai rai nga ai.

KBC a Sasana madung gaw Hkum Dingnum Sasana Ladat (Holistic Mission) rai n’na, Bawngring lam hpe n’gun jaw ai Makam Masham Hpung rai nga ai. Maga mi de, Makam Masham hte Dinghku hpe gawgap n’na, Amyu Mungdan a matu manu dan ai shinggyim uhpawng tai hkra shakut karum nga ai Christan makam masham hpung kaba rai nga ai.