Jinghpaw Jawnma Langai N nga Mat
June 21, 2006

Uma Brang

Myen mung Yangon mare na Bachelor of Arts in Religious Studies, BARS, kaw hpaji hkaja nga ai Jinghpaw Wunpawng jawngma langai gaw June 19 ya hta madaw adawt n’na si hkrum mat sai lam chye lu ai.

N’dai mawdaw adawt ai mabyin hta Jinghpaw ramma marai 3 lawm ai rai n’na, La Doi Din gaw kalang ta ningsa hti mat ai lam chye lu ai. Shi a manang yen rai nga ai Brang Seng hte Bawk Naw gaw hkala hkrum ai majaw tsi rung rawng ra mat sai rai nga ai.

Madaw adawt hkrum ai Jawngma ni gaw BARS jawng ngut n’na n’ta de wa ai hta lam hkawm nga ai shaloi tsa nang let mawdaw gawt wa ai la langai shang adawt ai re lam chye lu ai. Dai mabyin hta Jawngma marai 6 lamhkawm nga ai kaw na marai 3 hpe shang adawt hkrum ai rai nga ai.

Jawngma ni hpe shang adawt ai mawdaw la wa gaw adawt ngut ai hpang hprawng mat n’na shara myi kaw mawdaw kalang bai adawt ai majaw, mawdaw hpe tawn let hprawng mat ai lam chye lu ai.

N nga mat ai BARS jawngma gaw Sam mung Muse mare kaw na rai n’na, shi a makoi mayang ai lam hpe June 21 ya hta galaw na lam chye lu ai.