Lamung Tu Jai a Makoi Mayang Poi Galaw
June 18, 2006

The Kachin Post

Wunpawng Mungdan Shanglawt Hpung, KIO, ningbaw Du Daju Jum Lamung Tu Jai a moi mang makoi mayang hpawng hpe dai ni Laiza Muklum Myulawt Wunli Gawk Nu hta galaw ai lam chye lu ai. Lamung Tu Jai gaw June 15 shani hta n nga mat wa sai rai nga ai.

N’dai poi lamang hpe Du Kaba Gun Maw hku n’na lit la lajang ai rai n’na, shara shagu de na seng ang ai Salang ni hte makin jinghku ni sa du lawm ma ai, poi hta shang lawm nga ai KIA hpyen ma langai tsun wa ai. KIO ginjaw salang ni yawng ngu na daram mung n’dai poi hta shang lawm ma ai. Raitim, Thai kaw jahkring du nga ai KIC ningbaw malai I Du Kaba Gauri Zau Seng gaw shang lawm lu ai lam n nga ai hpe chye lu ai.

Ningbaw Kaba Lamung Tu Jai n nga mat majaw, KIO a mung masa policy galai shai ai lam n nga ai sha n ga, moi na hte maren sha rai nga na re lam, Du Kaba Gauri Zau Seng The Kachin Post de tsun ai. “Ginjaw kaw yanwg jawm hpawng galaw nga ai lam re majaw kaga hpa shai wa na lam n nga ai.”

Ya ten hta Ninbaw Kaba Lamung Tu Jai a shara hpe KIO Ginjo Komiti Tingnyang Up Malai I Lanyaw Zawng Hkra hpe lit jaw da n’na, nau n’na ai aten hta hpawng na KIO ginjaw zuhpawng hku n’na KIO ningbaw ningnan hpe shagrin sa wa na re lam chye lu ai.

Du Daju Jum Lamung Tu Jai n nga mat ai hpe Myen hpyen dap Dingdung Ginjaw Dap Up Du Kaba Ohn Myint wa hku n’na Laiza mare de sa du let ngam nga ai n’ta masha ni hpe n gun jaw ai lam chye lu ai.

Dai ni na makoi mayang poi de Sam gap hkat jahkring hpung ni mung sa du ma ai. Raitim, Zahkung Ting Ying a New Democratic Army-Kachin, Mahtu Naw a Kachin Defense Army hte KIO kawn 2004 ning hta garan pru mat wa ai Lasang Awng Wa a hpung ni n sa du ai hpe chye lu ai.

Chin National Front hte Ethnic Nationalities Council zawn re ai jinghku amyu sha mung masa hpung ni hku n’na mung Du Daju Jum Lamung Tu Jai n nga mat ai hpe rau sha yawn hkyen hkrum ma ai lam chye lu ai.

America na Nebraska mung daw Omaha mare nga Jinghpaw Wunpawng amyu sha ni mung Du Daju Jum Lamung Tu Jai n nga mat ai lam hpe masat dingsat jaw ai hku n’na makoi mayang lamang hpe June 18 ya hta galaw ai lam chye lu ai.