Shatapru Lup Wa hta Masha N mai Lup
June 11, 2006

Malihkrang Uma

Myitkyina mare Municipal rung gaw June 9 ya hta Shatapru Buga kata nga ai Makam Masham Hpung yawng hpe shaga la n’na Shatapru Lup Wa kaw masha n mai makoi mayang sai lam akajawng sha aming jaw dat ai lam chye lu ai.

Tau hkrau shana da ai lam, laika hte shadum ai lam hpa n nga ai sha kajawng kaja amying jahkrat ya ai majaw yawng gaw mau mat n’na, n’dai ten si ai moi mang ni hpe kara shara de makoi lu na lam ni n lu myit rai nga ma ai lam chye lu ai.

Byin wa ai lam gaw, Myen hpyen dap Dingdung Ginjaw Dap Up Du Kaba Ohn Myint hku na Shatapru Lup Wa makau hku lai wa hkrup yang Lup Wa hpe akajawng sha mu hkrup n’na n’dai shara kaw Myo Ka-ang she rai sai ya du hkra masha naw lup nga ai kun? ngu n’na makau e nga a salang ni hpe ga san san ai majaw akajawng sha Municipal kaw na aming jahkrat ai lam rai nga ai.

“N mai lup ai nga yang n mai lup ai sha re, kaga lata na lam n nga ai,” ngu Municipal salang ni tsun wa ma ai. Shara bai lajang ya na lam chyawm gaw tsun tim, galoi, gara shara kaw rai na hpe atsawm hkrak n chye lu ai lam tsun wa ma ai. N’dai shara ningnan bai lajang nga ai laman mina shara kaw sha naw makoi mayang nga yang n mai na kun? ngu san yu tim, “n mai ai, dai ni kaw n’na n mai lup sai,” nga n’na sha tsun ai lam chye lu ai.

Shawng de Shatapru Lup Wa hta Hkalup Hpung, Katawlik hpung, Anglican hpung, Yehowa hpung, Nat jaw hte Bukda hpung masha ni makoi mayang galaw nga ai shara rai nga ai.