Hpa Kant Mare hpe Myen Ga Jarit de Shalawm La
June 04, 2006

Mali Pan Tsun

Jinghpaw mung a Seng Maw ginra Hpa Kant mare hpe Myen mung Sagain ginwang de shalawm la kau wa sai lam, Hpa Kant mare masha ni hku chye lu ai.

N’dai laman hta Hpa Kant mare hta mare masha ni a shana yup tung jahpan hte htinggaw jahpan ni hpe Sagaing giwang de sa bang ra mat sai rai nga ai. Hpa Kant mare hpe Jinghpaw mung kata kawn Sagaing ginwang de gare la bang kau ai lam hpe Myen Hpyen Atsuya hku n’na tara shang n’dau ai lam n nga ai sha galaw ai lam chye lu ai.

Hpa Kant mare gaw mungkan hta manu dan dik htum ai Lung Seng pru ai Seng Maw ginra rai n’na, 1948 ning Myen mung English kaw na shanglawt lu ai hpang Jinghpaw mung ga jarit kata kaw lawm ai rai nga ai. 1947 ning Myen mung Gaw-da Upadi (Constitution) hta mung Hpa Kant ginra gaw Jinghpaw mung kaw lawm ai rai nga ai.

De Hpa Kant Seng Maw gira hpe Wunpawng Mungdan Shanglawt Hpung, KIO, kawn uphkang wa ai rai nga ai. Dai laman hta anhte Jinghpaw Wunpawang amyu sha ni hku n’na Lung Seng hpe wang lu wang lang htu shaw dut sha lai wa sai. Raitim, 1994 ning KIO hte Myen Hpyen Dap gap hkat jahkring ai kawn Hpa Kant mare hpe Myen uphkang ai mare byin wa hkra galaw wa sai. 1995 ning hta Hpa Kant mare gaw Jinghpaw mung kaw lawm ai mare langai byin wa sai hte maren Myen Hpyen Atsuya a uphkang rung ni hpe hpaw mat wa sai.

Myen Hpyen Atsuya hku n’na Hpa Kant mare hpe Sagaing ginwang de shalawm la wa ai lam hpe ganing re ai masing masa hte galaw ai hpe a’san sha n chye lu ai raitim, n’dai hku galaw ai ladat gaw Myen mung a Gaw-da Upadi (Constitution) hpe maja tawt lai dat ai rai nga ai.

Hpa Kant Seng Maw Gira gaw moi de Myen Hkaw Hkam ni Mandalay kaw uphkang nga ai aten hta Ginsi Du Wa ni uphkang kang hta sha ai Seng Maw buga rai nga ai.