Lido Lam na Jawng Wan Nat Hkrum
July 31, 2006

Uma Brang

Jinghpaw Mung Lido lam kaw na Nawng Mi mare a Lapran tsang Jawng langai July 27 ya shana hta wan nat hkrum ai hpe mare masha ni hku chye lu ai. N’dai mabyin hte seng n’na Myen hpyen dap Dingdung Ginjaw Dap Up Du Kaba Ohn Myint gaw nau n’na ai aten hta sa sagawn na lam chye lu ai.

Nawng Mi mare na lapran tsang jawng nat hkrum ai hte seng n’na, kadai nat ni hpa majaw nat ai lam hpe naw sa gawn nga ding yang rai nga ai lam hpe chye lu ai. Ya aten hta seng ang ai masha kaba ni hte buga kaw na mare salang ni hku n’na Jawng hpe lawan dik ai hku gap shangut lu na matu hte seng n’na bawng ban jahkrum nga ma ai.

Dai ning na Jawng lung shaning hta n’dai zawn re ai Lido lam mayan na Jawng ni hpe wan nat ai gaw n’dai lang hte rai yang 2 lang rai sai lam chye lu ai. Shawng na lang gaw Lawa Tsan Lun mare a lawu tsang jawng hpe lai wa sai June shata Jawng ningnan hpaw hpang nau n na ai a’ten hta wan nat hkrum ai re. Lawa Tsan Lun a mabyin chye lu ai daram nga yang, Jawng lung jarit grai law wa ai majaw n ra sharawng ai ni galaw nat ai lam hpe na lu ai.