Jinghpaw Ramma ni Internet Café Hpaw
July 21, 2006

Uma Brang

Myen mung Yangon mare nga Jinghpaw Wunpawng ramma marai 3 pawng let Internet Café langai hpe hpe hpaw hpang wa na re lam chye lu ai.

Lamung Gum San Awng, Rita Hkawn Awng hte N’pawt Htoi Seng Mai ni gumhpawn let ‘River Dee’ ngu ai mying hte du na bat prawt hkan hpaw hpang wa na rai nga ai. Internet Café hpe Yangon-Insein lam n’maw na Hledan shara kaw hpaw na rai nga ai. Café hpe computer 15 hte shawng bungli hpang wa na rai nga ai.

Internet Café hpaw hpang ai shani kawn 3 ya du hkra internet hpe manu jahpu n jaw ra ai sha mai lang na hte lu-sha ni hpe gaw mari sha ra na lam chye lu ai. Seng kaw dut ai lu-sha ni hpe Kyat 500 na matu mari yang, Internet hpe hking hkum mi hte Kyat 1,000 lahta de mari yang Internet hking hkum 2 mai lang na rai nga ai.

Ya ten hta Yangon nga Jinghpaw Wunpawng ramma law malawng gaw lani hte lani myi hpaw wa ai re majaw, tinang a prat rawt jat wa na matu Internet hpe lang let maigan nga tinang a jinghku, manaw manang ni hpe matut mahkai wa nga sai rai nga ai. Dai re majaw Yangon mare na Jinghpaw ni law malawng nga ai Sanchaung lawk na Internet Café hkan gaw Jinghpaw Wunpawng ramma ni hte hpring chyat nga ai rai nga ai.

Yangon na Internet Café hkan hking hkum mi Internet lang yang Kyat 500 ang ai rai nga ai.