JLH Yangon ni Jawngma Ningnan Hkalum Poi Galaw
July 03, 2006

Uma Brang

Jinghpaw Wunpawng Laili Laika hte Htunghking Hpung, JLH, (Yangung Dakkasu ni) woi awn n’na July 1 ya hta Yangon Dakkasu wang kata na Judson Church hta 2006-2007 ning Jawng ma ningnan hkalum poi lamang hte music show hpe galaw ngut sai lam chye lu ai.

N’dai poi hpe “Fresher Welcome, Music Show & Fun Fare” hku galaw ai rai n’na, 2006-2007 ning JLH Yangon amu gun ningnan ni a shawng ningnan galaw ai poi rai nga ai.JLH jawngma ni shada da ginhka hkat ai lam n nga ai sha, shada da makyit mahkai wa na hte tinang a amyu htunghking hte tinang amyu a laili laika hpe ngang grin hkra makawp maga lit la let, JLH hta mung grau n’na myit kap wa matu yaw shada n’na, poi hpe galaw re lam, JLH Amu Madu Sumdu Awng Nan tsun dan ai.

“Myu sha ni a matu myit mada kamhpa shara ninghtoi ningnan gaw anhte rai nga ai majaw, Wunpawng shani a shawng lam hpe shada da gahkin gumdin ta gindun n’na jawm galaw gunhpai sa wa ra nga ai,” ngu JLH Amu Madu Awng Nan kahtap tsun ai.

Poi hpaw Kyu Hpyi hpe Saranum Lama Lu Nan (Psychology Tutor), Hkalum ga hpe Saranum Htu Raw (Anthropology Tutor), Shatsam Ga hpe Sutdu Zahkung Hkun Sa, Chyeju dum ga hpe Yangon JLH amu madu Sumdu Aung Nan ni woi awn mat wa ai. Jawngma marai 170 jan sa du ma ai. Jawnma ningnan ni kaw na, hkalum kumhpa jaw ai hta jawngma marai (10) sa hkap la lu ai re.

Hpawng Hpaw lamang ngut ai hpang jawng ma shada da kanawn mazum lamang galaw ai. Dai ngut ai hpang Music show hpe galaw mat wa ai hta Rebecca Win, L Seng Zi, Hkam Seng, Blue Berry, Memory, Ji Mai San, Seng Ing, L Lung Wa, Dau Lum, Aura Li, Seng Li, Zau Lum hte Aw Le Le ni shang lawm shangwi shapyaw ma ai.

N’dai poi lamang byin tai wa na matu Jawngma dingsa ni mung gumhpraw lap130,000 garum ai lam mung chye lu ai.

JLH Yangon kawn matut n’na 2006 ning September shata hta Mr. & Miss J.L.H hte Music show poi lamang kaba langai galaw na lam chye lu ai. N’dai poi galaw sa wa na a madung gaw Jawngma ni grau n’na JLH kaw myit kap wa na matu hte JLH fund tam hku re ai lam chye lu ai.

Matut n’na, 2006 ning November shata praw hta Myen mung JLH Jawngma ni a 3 lang ngu na Zuphpawng hpe Yangon JLH ni hku lit la galaw sa wa na re hpe mung chye lu ai. N’dai Shawng ningnan lang na Myen mung JLH jawng ma ni a zuphpawng hpe Pyinoolwin kaw galaw sai rai n’na, No 2 lang hpe Myitkyina kaw galaw la lu sai rai nga ai.