Sinpraw Majoi Manau Poi Galaw Na
January 21, 2006

The Kachin Post

Jinghpaw mung Laiza Muk Lum kaw Sinpraw Majoi Manau Htingnu Dingshawn Poi hte 45 ning Rawt Malan galaw na matu hkyen lajang nga ma ai.

February praw 4 ya shani gaw Wunpawng Mungdan Shanglawt Hpung, KIO, a uphkang ginra Laiza Muk Lum kaw gaw gap da ngut sai Manau Htingnu dingshawn shang Poi hpe galaw na rai nga ai. Manau Htingnu mying hpe “Sinpraw Majoi Manau Htingnu” ngu shamying n’htawm Manau hpe “Sinpraw Majoi Manau Htingnu Dingshawn Shang Poi” ngu shamying na hpe poi committee ni hku chye lu ai.

N’dai Poi lamang hpe February praw 3 ya shana kawn Yu Ngwi Pinra hte hpang na rai n’na, praw 4 ya shana gaw Wunpawng Ningja Htung hking Hpung, WNJ, hte kaga buga hkan na du sa ai mahkyen ni hte shangwi shapyaw na rai nga ai. Praw 5 ya shana gaw Shanglawt Masa Gat hkai Hpung (KIO Propaganda Team) ni shangwi shapyaw na rai nga ai.

Manau Poi hta Miwa Gumsan Mungdan na Htung Hking Hpung, Sam Laili Laika hte Htung Hking Hpung, Gala Laili Laika hte Htung Hking Hpung, Miwa Hpara Jawng ni mung tinang a Htung Hking ka manawt ni hte shang lawm na matu saw shaga lajin da sai rai nga ai.

Laiza Muk Lum e galaw na Sinpraw Majoi Manau Htingnu Dingshawn Shang Poi hte 45 ning hpring Rawtmalan Poi a matu Miwa Gumhpraw Yuan Sen 40 jan jahkrat da ai lam KIO shiga lawk hku chye lu ai.