Ramma ni KIO Ningbaw ni hpe N’gun N lu
January 10, 2006

Mali Pan Tsun

Wunpawng Mungdan Shanglawt Hpung, KIO, a Muse Ninghtawn rung na magam gun 5 hpe Myen hpyen la ni January 2 ya hta gap sat kau ai manghkang hte seng n’na KIO ningbaw ni a daw dan ai lam ni hpe n’gun n lu ai majaw Jinghpaw Wunpawng ramma ni hku n’na san shaga mayu nga ai lam, Myitkyina ramma shiga lawk hku chye lu ai.

January 8 ya hta, Jinghpaw mung na Jinghpaw Wunpawng ramma ni hte Sam mung (Sub State) na ramma ni Myitkyina KIO dat kasa rung de san shaga na matu bawng ban jahkrup sai rai nga ai. N’dai hta Sam mung na Jinghpaw Wunpawng ramma marai 30 daram mung shang lawm ai lam chye lu ai.

KIO hte Myen hpyen dap gap hkat jahkring da ai laman simsa lam kaja wa lu sai kun?, laknak jahkrat ai n re nga n’na KIO ningbaw ni tsun nga tim, Myen hpyen la ni gap wa ai shaloi hpa majaw bai n gap ai rai?, ngu ai ga san ni hpe san mayu nga ai lam chye lu ai. “Saboi ningtsa jahkrup taw tim katut sha nga ai le,” ngu n’na ramma langai marawn tsun wa ai.

Grau n’na ramma nia gaw tinang Jinghpaw Wunpawng amyu sha ni hpe Myen hpyen dap hku n’na, kade lang mung gap sat, nat sat, mayun rim sat nga ai lam ni hpe KIO ningbaw ni hku n’na nau ahkyak n shatai ya ai lam hpe myit n gut nga ai lam chye lu ai.

Ramma ni gaw Myitkyina kaw du nga ai KIO ningbaw malai I Du Kaba Gauri Zau Seng hte hkrum shaga na matu lajin ai raitim, n lu hkrum shaga shi ai lam chye lu ai. Grau n’na ramma ni gaw Sam mung de KIO hpyen la ni gap sat katut ai aten hta Gauri Zau Seng hku n’na January 7 ya hta Myitkyina kaw galaw ai Myen Hpyen Atsuya a National Convention madi shadaw poi de sa du shang lawm ai lam hpe n ra sharawng ai lam, ramma ni tsun wa ai. National Convention madi shadaw poi hta Gauri Zau Seng, Myitkyina KIO rung lit hkam Du Hkun Nawng hte Yup Zau Hkawng ni shang lawm madi shadaw ai lam Myen shi laika hku chye lu ai.

National Convention hpe KIO hku na myit hkrum lawm nga dingyang raitim, n’dai zawn roi rip ai lam gaw anhte Jinghpaw Wunpawng amyu sha ni hpe hpa zawn n nawn ai lachyum re majaw, NC lung ai hpa lachyum n pru ai lam, ramma ni tsun wa ma ai.

January 7 ya na National Convention madi shadaw poi de Du Kaba Gauri Zau Seng shang lawm ai lam hte seng n’na KIO Ginjaw Salang n’kau myit n hkrum ai lam, KIO shiga lawk hku chye lu ai.