Jinghpaw Mungdaw N’htoi hta Htunghking hpe Jahten na Hkyen
January 04, 2006

Myu Shayi

58 lang na Jinghpaw Mungdaw n’htoi hpe shawoi shaning hkan galaw ai poi hte nbung ai hku galaw na hkyen lajang nga ai hpe na lu ai.

Dai ning na Jinghpaw Mungdaw n’htoi poi hpe shaning shagu galaw nga ai January 10 ya malai Myen mung shanglawt lu ai January 4 kawn galaw hpang na rai nga ai. Ngut n’na, poi hpe Myen hpyen uphkang ai ni hte poi shabyin shatai committee pawng galaw na rai nga ai. Poi lamang hpe January 4 kawn 11 ya du hkra masat da ai lam chye lu ai.

N’dai poi hta shawoi shaning hte n bung ai, Jinghpaw Wunpawng htunghking hte ninghtan shai ai Myen Pya Zat hpe Myitkyina Shatapru na Nat Jaw Wang kaw galaw na lam na lu ai. N’dai lam hpe Myen hpye uphkang ai ni hku n’na ahkyak ai lamang langai hku shalawm shangun ai rai n’na, Jinghpaw Mungdaw poi hta Pya Zat n lawm yang Manau Wang hpe zing la na hku shagyeng ai lam Myitkyina shiga lawk hku na lu ai.

Shatapru Manau wang kaw galaw na 58 lang na Jinghpaw Mungdaw n htoi hta Myen Hpyen Atsuya magam gun (Htana Seng Ya Pawng Tsung) ni mung shara la nga ma ai.

Bai na Manau Wang kata hta Company gat seng ni hpe Kyat 300,000 hte shap nga ma ai majaw kaga lu sha seng ni gaw Manau Wang shinggan de sha shara lu mat ai. Poi hta shangwi shapyaw na matu Myen mung na yu ngwi ning hkring kaba ni hpe mung manu jahpu law law hte saw shaga da ai hpe chye lu ai.

Dai ning na Jinghpaw Mungdaw n’htoi poi galaw ai masa gaw shawoi na hte ninghtan shai ai lam ni hpe mu lu ai majaw myutsaw Jinghpaw Wunpawng Ramma n kau mi grai myit n pyaw ai lam chye lu ai.