Jinghpaw Ginsup Journal Shapraw
September 27, 2005

Malihkrang Uma

Shawng ningnan lang na Jinghpaw ga hte shapraw ai Ginsup Journal hpe Myitkyina Ginwang Jinghpaw Wunpawng Hkalup Hpung, KBC, Ramma dap kawn “Shing-re” ngu ai shingteng amying hte Ginwang Lanam Gawdin poi laman bat mi kalang shapraw lu sai rai nga ai.

Moi de anhte amyu sha ni kaw Ginsup Journal san san ngu ai n nga yu ai rai n’na, moi prat na Jinghpaw Prat zawn re ai Shi Laika ni hkan ginsup shiga ni hpe katsat bang ai sha nga yu ai rai nga ai.

Myitkyina Ginwang Lanam Gawdin shingjawng poi gaw shaning shagu galaw nga ai lamang langai mi raitim, daining na poi hta laklai ai lam gaw bat mi tup ginsup lai mat wa ai lamang ni hpe “Shing-re” Ginsup Journal hte ginsup poi n sa yu lu ai hpung shawa ni a matu dut shabra ya ai rai nga ai.

N’dai Journal a matu, Editor hpung, photo journalists, journalists hte layout designers ni hpe KBC Buga shagu na Ramma ni hpe laksan shatsam da n’htawm shamu shamawt ai rai nga ai.

Ningnan shapraw ai Journal re majaw manghkang amyu myu hkrum katut ra ai lam Journalist hpa-awn Labang Gam Awng tsun wa ai. N’kau, myit n su ai poi yu shawa ni hte Gawdin hpung ni gaw Journalist ni hpe amyu myu jahpoi, a’sawng, jahpyak, htim share, di ya ai majaw Journalist shatsam da ai ramma n’kau mi hkring mat sai lam chye lu ai. Raitim, Journal gaw shapraw nga dingyang rai nga ai ngu, Gam Awng tsun wa ai.

N’dai Journal hpe Mung masa, Sut masa, Hpyen masa ni tsep kawp n shalawm ai rai n’na, Gawdin poi a shiga hpe sha san san ka ai lam chye lu ai.

Raitim, moi prat na ningtawn lai wa sai Jinghpaw Wunpawng Ginsup ninghkring ni a lam ni hpe mung ka shalawm ai hpe mu lu ai.

Dai ning na Myitkyina Ginwang Gawdin poi gaw September 11 kawn hpang n’na October 3 shani hta ninggang kashun let hpungdim dat na rai nga ai.

Poi ngut du hkra rai yang, Ginsup Journal mali lang lu shapraw na re ai lam chye lu ai.