Laiza kaw Lung Seng Gat Lawk Hpaw Na
September 20, 2005

Malihkrang Uma

Wunpawng Mungdan Shanglawt Hpung, KIO, hku n’na myit ningshawn shaw let Laiza Muklum mare kaba kaw du na ra ai shaning kawn hpang let Lung seng gat lawk galaw mat wa na lam chye lu ai.

Laiwa sai September shata praw 15 hte 16 ya laman Laiza Hotel kaw KIO Ginjaw salang ni hte Lung Seng hpaga la marai 70 rau jawm bawngban let lung seng gat lawk a matu jahkrum ai lamang a daw dan ai lam rai nga ai.

Dai zuphpawng kaw Miwa Gumsan Mung na Jinghpaw Sutdu ni hte ‘Share’ arang bang malawm Miwa Sutdu ni mung shang lawm ai rai nga ai.

Lung Seng gat lawk hta ‘Share’ arang bang ai lam hte seng n’na, Myen Mung na masha ni na gaw ‘Share’ langai hpe Miwa gumhpraw Yuan 10,000 hte bang mai n’na, Miwa Mung na ni gaw Yuan 100,000 bang ra na re lam chye lu ai.

‘Share’ ni hpe du na October shata kaw n’na dut hpang wa na lam chye lu ai.

N’dai lung seng gat lawk galaw ai lachyum gaw Jinghpaw mung na Hpun shaw dut ai hpaga ni hpe shayawm kau lu na matu re lam chye lu ai. N’dai hku byin wa ai lam gaw Hpun shaw dut sha nga ai lam ni hpe Myen hpyen atsuya hte Mungkan Shingra Tara Yu Lajang hpung ni hku n’na hpun shaw dut ai lam hpe laja lana ninghkap wa ai majaw re lam chye lu ai.