Computer Hkaw Tsun Hpawng Shatapru Kaw Galaw
November 22, 2005

Malihkrang Uma

Jinghpaw Wunpawng Hkalup Hpung Ginjaw (KBC) Ramma Dap a Computer Sharin Ginra hte Shatapru Buga Hkalup Hpung Ramma Dap a LOGOS Computer Sharin Ginra jawm gumhpawn n’na November 19 ya hta Shatapru Nawku Jawng Gawknu kaw Computer hkaw tsun hpawng galaw la lu sai rai nga ai.

N’dai hkaw tsun hpawng kaw Mandaly MICT Park kaw na Guiding Star Computer Software Engineering Ginra a Hpareng Hpa-awn (Managing Director) Saya Thurein Maung Mg hte ningrum ningtau jan Sayama San San Htwe ni lak san Mandalay kaw na lung wa let sa hkaw tsun ya n’na Myitkyina Computer College a sharin Saranum Myi-naw Htu Ra mung Software Engineering hte seng n’na hkaw tsun sai rai nga ai.

Saranum Myi-naw Htu Ra hkaw tsun ai hta, daini anhte kaw Jinghpaw aga hku shaga dat yang Maigan aga hpe Computer kaw na byan ya ai baw Software ni hpe gawgap ra sai lam, daini anhte kaw shakut yang mai byin na re lam, Maigan aga, laika ni hte shaga (sh) ka da ai laika buk ni hpe Jinghpaw ga hku loi loi chye na na matu Software ka da lu yang daini anhte amyu sha ni jahkring sha hpaji madang tsaw wa na lam hkaw tsun wa ai.

Saya Thurein Maung Mg hkaw tsun ai hta, daini na mungkan gaw Computer hte makai da ai re majaw anhte ni Computer machye machyang hkum tsup ai wa a matu gaw gara shara kaw nga tim Mungkan ga shinggan masha ngu n mai sawn sai. Daini anhte Mungdan kaw yak hkak ai lam kade nga tim computer hte lu galaw ai bungli ni grai law nga ai, Ramma ni Maigan sa n’na bungli galaw na shing n rai, ja maw sa na, lung-seng htu na, ngu ai chyu myit nga na malai, IT hpe nta kaw nga n’na shachyut la let, Maigan shara shagu na Magam Bungli ni hpe Internet lang n’na mai galaw sai lam ni tsun dan wa ai.

“Yangon hte Mandalay kaw gaw Software ka dut sha ai Company ni nga wa sai, nanhte Myitkyina kaw mung nanhte shakut ai hta hkan n’na nga wa na sha re,” nga n’na Thurein Maung Mg tsun ai.

N’dai hkaw tsun hpawng hta Projector kaw na Power Point ni hte laika shingni, sumla ni madun da ya ai re majaw sa du madat lawm ai ni chye na loi hkra lajang ya lu nga sai.

Matut n’na mung n’dai zawn hkaw tsun hpawng ni law law galaw mat wa na lam KBC Ramma Hpa-awn Sr. Gumgrawng Hkan Naw kawn tsun wa ai. N’dai zawn Computer hkaw tsun hpawng hpe hpang shani hta Myitkyina sinpraw hkrang na Wai Maw mare kaw matut galaw ai lam chye lu ai.