Pan Kachin College Mying Galai ai hpe Pan Kachin Ningbaw Ninghkap
November 04, 2005

The Kachin Post

Wunpawng Mungdan Shanglawt Hpung, KIO, a ningbaw Du Kaba Lamung Tu Jai a matsun hte Mai Ja Yang mare hta hpaw tawn ai Pan Kachin College, PKC, hpe mying galai kau na lam hpe Pan Kachin ningbaw hku n’na n ra sharawng ai lam dinglun dat ai hpe chye lu ai.

N’dai lam hte seng n’na, Pan Kachin ningbaw Bawmwang La Raw gaw KIO ningbaw hpang de November 2 n’htoi hte n’dau shabra laika ka dat ai sai rai nga ai.

PKC jawng hpe gaw English hte Computer jawng (Mai Ja Yang) ngu n’na mying galai shamying na matu October 22 n’htoi hte shabra ai Kachin Independence Council a matsun laika hta mu lu nga ai. Dai laika hta, English hte Computer jawng hpe ngang grin galu kaba wa hkra ra rawng ai lam ni hpe shading sharai kau n’na, grau manu grau kaja hkra policy ningnan jahkrat n’na galaw sa wa ra ai majaw n’dai zawn galaw ra ai re lam sang lang da nga ai.

Raitim, Bawmwang La Raw gaw, “n’dai zawn ningbaw kaba nang ya na zawn galaw na hpe galoi mung n tau ai. Myit mung n myit mada da ai,” ngu shi a n’dau shabra laika ka hta ka da nga ai. “Ya na zawn anhte a ningbaw ni nan nan tinang amyu sha ni a matu, hpaji hparat lam hpe galaw shakut nga ai PKC jawng hpe ning hkap jahten ai lam gaw, mau hpa shut ai lam rai sai.”

Pan Kachin College gaw Jinghpaw mung buga shagu de na Jinghpaw Wunpanwg ramma ni hpe English hte Computer hpaji ni hpe sharin ya nga ai jawng langai rai nga ai. N’dai zawn re hpaji ni hpe tinang Wunpanwg amyu sha Sara ni hte rau maigan amyu Sara ni mung jahpu manu n la ai sha sharin ya nga ai jawng langai rai nga ai. Ngut n’na PKC gaw mai gan NGO ni kawn ram daw ngu na daram garum shingtau ai lam lu ai jawng langai re ai hte maren dai jawng kaw na awng mat wa ai jawng ma ni hpe mung maigan mungdan hkan jawng matut lung lu hkra galaw ya nga ai hpe mung chye lu ai.

KIC matsun laika hte maren, PKC hpe English hte Computer jawng (Mai Ja Yang) ngu shamying ai sha n nga, Jawng committee ningnang lak san hpaw n’na, dai committee hta KIO Ginjaw Hpaji Dap kaw na salang, KRDC kaw na salang, Sinpraw Ginwang Ginjaw committee kaw na salang, Sinpraw Ginwang Ginjaw Hpaji Dap kaw na salang ni hte htap htuk ai jawng sara, saranum ni hpe shalawm na lam chye lu ai. Jawng a sharin matsun (Curriculum) hte sharing ginhpan (Syllabus) ni hpe mung jawng committee kaw n’na daw dan masat na lam chye lu ai.

N’dai zawn jawng committee ningnan hpaw let sharing matsun, ginhpan ni hpe galai kau hpe mung Bawmwang La Raw gaw grai myit n dik nga ai. “Sharin achyin ai lam hte seng n’na mung, jawng ma ni a ahkyak dik lamang ni hpe myit yu sawn yu n’na ngut jin ai ladat hte sharin ya nga ai re ai majaw, lamang galai sharin na lam n nga ai,” ngu La Raw tsun ai.

Hpa myi raitim, KIO hku n’na gaw shi mastun da ai masing hte maren byin mai ai hku galaw sa wa na hpe mu lu ai. Grau n’an KIO gaw PKC hpe (mung masa n shanut ai) laika sha a’san sharin ai jawng langai byin wa na hpe ra sharawng ai lam mu lu ai. “N’dai jawng hta e maigan mungdan ni kaw n’na mung masa bungli shamu shamawt shang achya lau ai lam, mung masa hku n’na shang achya shanut ai lam n byin n hkrum na matu koi gam ra na,” ngu KIC matsun laika hta ka da nga ai.