Kani Hpraw Ya Tai ai Jinghpaw Ramma ni Grai Law Wa
May 27, 2005

N’hkum Gam

Jinghpaw Mung Myitkyina mare nga Jinghpaw Wunpawng ramma ka-ang hkup ngu na daram gaw Kani Hpraw ya tai ma sai lam, Yangon mare de sa du n’na Kani dawn nga ai ramma langai tsun wa ai.

“Shatapru hte U Byit ni hta Kani hpaw lu sha ai Ramma law dik rai n’na ramma yawng a tsa lam shadang na 56% gaw Kani Hpraw ya rai wa sai. Janmai Kawng, Yuzana hte Maisak Wang hkan mung lu sha ai nga ma ai,” ngu Yangon kaw Kani dawn nga ai Hkun Du tsun wa ai. Kani Hpraw lu sha ai ni hpe lak san jahpan galaw da ai lam n nga tim, shani shagu mu mada nga ai lam hpe maram yu n’na shi tsun dan ai rai nga ai.

N’dai zawn Kani Hpraw lu sha ai ramma ni lahkawng ning na laman grai law htam wa ai lam gaw Myen atsuya hku n’na Kani Hpraw dut ai ni hpe n rim ai lam (tara shang ngu na daram dut na ahkang jaw ai), Kani Hpraw manu gaw Kani Chyang manu hta pyi grau hkyam sa ai lam hte ramma shada lapran hta Kani Hpraw dut shabra nga ai lam ni a majaw re lam, Shatapru na ramma Zau Mai Du tsun dan wa ai.

“Kani dut sha nga ai ni mung, Balik ni hpe shanhte hpyi ai daram gumhpraw lu jaw kau yang n hkrit n tsang dut sha nga ma ai,” ngu Kani Hpraw hpe lu sha lai wa sai Zau Mai Du tsun ai.

Shi matut tsun ai hta, laiwa sai lahkawng ning daram hta Jinghpaw ramma ni Kani Hpraw lu sha ai nau n law tim, ya gaw ramma ni lapran hta mari-shalai-dut ai lam ni nga mat sai hte Myen Kani rim Balik ni nan dut shabraw nga ai majaw lu sha ai ramma ni hkrit na daram law wa ai.

Kani dut ai ramma ni gaw Kani Hpraw hpe Telephone hte matut n’na ra ai daram mari shalai nga ai hpe chye lu ai. “N’dai ramma ni hpe Kani Hpraw dut jaw nga ai ni gaw Miwa hte Gala ni law malawng re,” ngu Zau Mai Du tsun wa ai.

Kani Hpraw Penicillin n’dum magap mi hpe Myen gumhpraw lap 1,000, Penicillin n’dum mi hpe lap 20,000 kawn 30,000 lapran dut sha nga ma ai lam chye lu ai. Dut shabra ai shara law wa ai majaw mung lu sha ai ni grai law wa ai rai nga ai. Shatapru mare langai mi hta sha pyi Kani Hpraw dut shabra ai shara n law htum 80 daram nga ai lam Shatapru mare na Naw Ja tsun dan ai. Kani Hpraw law malawng gaw Miwa hkran hte Laiza hku n’na malawng du wa ai re lam chye lu ai.

Myitkyina mare hta Kani Hpraw lu sha ai ramma ni sha n nga, kaga Nang Hpam tsi (Formula/ Dose) ni hpe lu sha ai ramma ni mung tsa lam shadang na 10% nga ai lam chye lu ai.

Myitkyina mare lahta, mile 10 jan tsan ai U byit, Ah Lam, Dum Gan kahtawng hkan Nang Hpam tsi ni hpe wang lu wang dut-lu dut-sha nga ai zawn, Myitkyin mare kata na Du Kahtawng, Dap Kawng, Shatapru, Ziun, Maisakwang, Manhkring, N’bawn Lup, N’jang Dung, Jan Mai Kawng hkan e mung Nang Hpam tsi ni hpe loi loi sha mari la mai ai lam chye lu ai.