Wunrawt Nawku Hpung Masha ni Garum Hpyi
May 25, 2005

The Kachin Post

Thai mungdan Mahachai mare na Wunrawt Nawku Hpung masha 160 gaw Thai mung kaw nga yak jam jau wa ai majaw, America mungdan de sa lu na matu America nga Jinghpaw Wunpawng amyu sha ni hpang de hpyi lajin dat ai lam chye lu ai.

Wunrawt Nawku Hpung masha ni gaw Jinghpaw Wunpawng buga kaw nga yak ai lam amyu myu a majaw Thai mungdan de sa du shanu let Wunrawt Nawku hpung hpe January 2005 hta gaw de wa ai lam, Nawku hpung a May 10 ya n’dau shabra laika hta mu lu ai.

“Wunrawt Nawku Hpung na Chyurum hpu-nau ni hkam sha nga ai n-ni n-kri lam ni hpe chye lu na hte America mungdan de sa nga lu na matu anhte a ningtsa tsawra matsan dum ya na hpe ra sharawng let a’kroi a’noi hpyi lajin dat n’ngai,” ngu Nawku hpung Amu Madu Myitung Hkaw Chyang lit la hpyi lajin da nga ai.

Mahacahi nga Wunrawt Hpung masha law malawng gaw Thai mung de lam amyu myu hku n’na tinang a n’ta, arung arai ni hpe hkoi shap let sa du n’na lu ai bungli ni hpe galaw sha nga ra ai ni rai nga ai. Law malawng gaw Nga (Fish) jak rung hkan bungli galaw nga ai lam chye lu ai.

“Anhte Mahachai kaw na hpu nau ni yawng gaw Nga (fish) jak rung hkan galaw ai majaw madi manyap hte shani shana galaw nga ai rai n’na yup a tsawm n hkru, lu sha atsawm n shagrung lu ai majaw machyi makaw lam grai law ai,” ngu n’dau shabra laika hta ka da nga ai.

Machyi makaw hkrum n’na Atsuya tsi rung hkan tsi tsi yang mung tang du ai lam n nga ai majaw, shinggan tsi rung hkan she gumhpraw grai ma hkam n’na tsi tsi ra ai lam chye lu ai. “Shinggan kaw tsi ra ai rai yang grai hpu ai majaw n dang hkam wa nga ai.”

Dai zawn re bungli galaw nga ai ni hta Thai mung kaw tara shang bungli galaw na lek mat n lu ai ni hpe Thai Balik ni rim n’na Myen mung de bai sa hkrum ai ni mung nga ai lam hte tara shang bungli galaw lu na matu Labor Card lu na matu mung gumhpraw grai ma hkam ra ai lam chye lu ai.

Myen amyu sha ni Thai mung kaw UN High Commissioner for Refugee rung hta refugee shawk n’na maigan mung dan ni de sa lu ai raitim, Wunrawt Hpung masha ni a matu gaw n mai byin ai lam tsun da nga ai. “Thai lauban ni nau zingri n na n lu hkam ai majaw, UN rung de sa yu yang Jinghpaw ni hte bum nga masha ni a matu n lawm ai nga ai majaw myit grai htum mat saga ai.”

Wunrawt Nawku Hpung gaw Mahachai mare na Thai Baptist Church kaw shanglawm n’na laksan jaw tawn ai Nawku Htingnu kaw laban bat shagu Jinghpaw hku Nawku Dawjau nga ai Hpung langai rai nga ai. Mahachai mare gaw Bangkok mare a Sinna Dingda maga mile 20 jan tsan ai kaw nga ai rai nga ai.