Dagon Centre hte Junction Eight hta Shimlam Grai Shachyip Nga
May 24, 2005

N’hkum Gam/ Yangon

Yangon mare na Dagon Centre hte Junction Eight Shopping Mall ni hta shimlam hpe aja awa shachyip nga ai hpe mu lu ai. N’dai gat seng kaba lahkawng hte Thai gun rai madun poi kaw May shata 7 ya hta bawm 3 lang kalang ta ngu na daram kapaw ai majaw masha 19 si let 160 jan hkala hkrum sha mat ai sai rai nga ai.

Dagon Centre hte Junction Eight gat seng ni hpe May 21 ya kawn bai hpaw sai raitim, moi na zawn wanglu wanglang gat mari n mai ai sha n ga, gat mari sa ai ni hpe langai hpang langai hkum ting hpe masawp jep ma ai. Gap mari sa ai ni a rai ni hpe mung gat seng shimlam ni hkun n’na langai hpang langai jep n’na she bai jaw dat ma ai. Gat seng makau hkan mung Myen Hpyen La hte Balik ni grai law hkra zawng nga ai.

Moi gaw Dagon Centre hte Junction Eight ni hpe jahpawt hking 9:00 kawn shana hking 9:00 du hkra hpaw ai raitim, ya gaw jahpawt hking 9:00 kawn shana hking 7:00 du hkra sha hpaw ma ai.

Yangon mare na mawdaw laiwa laisa law ai lam n’maw kaba hkan mung Taxi hte kaga mawdaw ni hpe shana 9:00 hpang de seng ang ai mare salang ni hte Wan Sat La ni hku n’na hkap jep nga ai lam, Taxi la langai tsun wa ai.

Yangon mare na kaga gat seng kaba ni rai nga ai Kyaw Super Mart, Gamone Pwint zawn re ai shara hkan mung shimlam grai jahkrat da ma ai. Myen mung masha pru pru shang shang law ai Summit Park View Hotel hte kaga Hotel kaba ni hkan mung n’hpye kaba ni hpai sa ai hpe hkum pat da nga ai.