Myen hte Bai Gasat na SSNA N’dau
May 22, 2005

The Kachin Post

Myen hpyen dap hte gap hkat jahkring da ai Sam mung na Shan State National Army, SSNA, gaw gap hkat jahkring da ai hpe dawm kau n’na, majan bai hpaw dat sai lam, Bangkok Post shiga hku chye lu ai.

SSNA ningbaw Col Sai Yi hte Shan State Army, SSA, ningbaw Col Yawd Serk ni gaw Sam rawtmalan uhpung lahkawng pawng hpawn n’na Myen hpyen dap hpe ninghkap gasat wa sa na re lam mani hta SSA ginjaw Loi Taileng kaw n’dau dat sai rai nga ai. N’dai n’dau ai lam hpe Sam mung shawa hte dap shawa ni mung aja awa madi shadaw ai lam chye lu ai.

SSNA hpyen la marai 5,000 kawn 6,000 daram gaw SSA hpyen dap de shang lawm mat sai rai n’na, Col Sai Yi mung SSA a hpyen ningbaw langai hku lit la sai lam chye lu ai.

“Myen hpyen du ni gaw ga sadi hpe jahten n’na anhte a ahkyak ai malawm n’kau mi hpe woi mat sai. Ya anhte hpe lak nak jahkrat shangun nga ai. Lama anhte galaw yang, shanhte anhte hpe galoi aten tim sat kau na ra ai,” ngu SSNA ningbaw Col Sai Yi Bangkok Post de tsun wa ai.

SSNA gaw Myen hpyen dap hte 1995 ning hta gap hkat jahkring lam la da ai uhpung langai rai nga ai. Raitim, laiwa sai April shata Myen hpyen dap a atik anang shagyip shagyeng ai majaw Du Ka Na ningbaw ai SSNA a Dap Ba 11 gaw lak nak jahkrat ra mat ai. Matu n’na mung Myen hpyen dap gaw SSNA malawm ni hpe lak nak jahkrat wa na matu lam amyu myu hku n’na galaw nga ai majaw, SSNA hku n’na Myen hpyen dap hpe bai gasat wa ai rai nga ai.

Myen hpyen du ni Myen mung hpe simsa lam gaw gap nga ai lam hpe n kam ai hte n’dai zawn re ai ladat ni hte sha galaw nga ai rai yang manghkang grau sawng wa na re ngu, Col Sai Yi tsun wa ai.

Ya ten hta, Sam mung Dingda na Sam mare ni hpe Myen hpyen dap ni mare ting ting wan nat roi rip nga ai majaw Sam mare masha 200 kawn 300 daram shani shagu Thai mung dan de hprawng shang nga ai lam chye lu ai.

Sam mung hta Sam amyu sha rawtmalan hpung 3 nga ai kaw na SSNA hte Shan State Army North, SSA-N, gaw Myen hpyen dap hte gap jahkring da ai hpung ni rai n’na, Yawd Serk ningbaw ai Shan State Army gaw Myen hpyen dap hpe dai ni du hkra ninghkap gasat nga ai uhpung rai nga ai.

SSNA gaw SSA-North hte rau 1996 ning hta Shan State Peace Council, SSPC, hpe hpaw hpang wa ai rai nga ai. De hpang, SSA-North hte SSNA ni gaw Shan National League for Democracy, SNLD, hte jawm n’na Shan State Joint Action Committee hpe matut hpaw hpang wa ai rai nga ai.

Laiwa sai February shata praw kawn, Shan State Peace Council ningbaw Gen Hso Ten hte malawm 4, SNLD ningbaw ni rai nga ai Tingnyang Up Hkun Htun Oo hte Ninggawn Amu Madu Sai Nyunt Lwin ni hpe rim n’na, Yangon mare na Insein htawng kaw tara je yang ai lam n nga ai sha rim rawng da ai rai nga ai.