Hpun Hkai Dabang Jaw Bum kaw Galaw Ngut May 19, 2005
Malihkrang Uma
Myen mung Hkristan Jawng Ma Shamu Shamawt hpung woi awn let Myitkyina mare na Jaw Masat Bum hta hpun hkai bungli dabang langai mi hpe laiwa sai May 8 kawn 15 ya laman galaw wa sai rai nga ai.
Myen mung ting na Dakkasu Hkristan Jawngma marai 150 jan gaw Jaw Masat Bum bungli dabang hta shang lawm let, Jaw Bum makau grup yin hkan e hpun hkai ai bungli hpe madung dat galaw ai rai nga ai.
Bungli dabang gaw Myanmar Student Christian Movement, Myanmar SCM, a shaning shagu galaw nga ai lamang langai rai n’na, Myanmar Council of Churches, MCC, hku na madi shadaw nga ai rai nga ai. Myitkyina nga Dakkasu jawngma dingsa ni law law mung n’dai bungli dabang hta garum gumhpraw jaw bang ai lam chye lu ai.
“N’dai bungli dabang a yaw shada ai lam gaw anhte Dakkasu Hkristan Jawngma shada da n’dai bungli dabang kaw na hkau chyap mat n’na, shawa ting hte seng ai amu magam lam ni hpe rau jawm galaw chye ai myit masa lu la let Karai Kasang hpan da ai mungkan hpe chye tsawra wa na matu re,” nga n’na Myanmar SCM a National Secretary Thra Saw Swe Lynn tsun wa ai.
Myanmar SCM hku n’na bungli dabang hpe shaning shagu galaw nga ai raitim, 15 ning ladaw laman n’dai lang gaw shawng ningnan lang ngu na Myitkyina kaw galaw ai lamang rai nga ai.
Bungli dabang hta World Vision NGO a Masha Hpaga Lam (Human Trafficking) hte seng n’na hkaw tsun bawngban ai zawn, Sara Laje Hting Nan woi awn let Shingra Tara Makawp Maga Hpaji ni hpe sanglang dan n’na, bawng ban dinglun ai lam ni hpe mung galaw ma ai.
Shingra Tara Makawp hpaji hpe dinglun ai lam hta, anhte Jinghpaw Wunpawng Buga gaw ya ten Mungkan hta Lamu Ga Hkawnset (Virgin Land) shara ni law law naw nga ai lam, raitim, du na shaning 50 daram hta gaw ya na hku sha zingri nga ai rai yang yawng htum mat na re lam tsun jahta dinglun ai lam hpe chye lu ai.
Myanmar SCM gaw moi de University Christian Fellowship, UCF, ngu law malawng chye ai rai n’na, ya gaw Mungkan ting jai lang ai mying SCM ngu ai hpe bai lang ai rai nga ai. Myen Mung Hkristan Hpung Ginjaw (MCC) a npu na magam Dap langai mung rai nga ai.
