Maigan Mungdan Kaba Langai Yangon kaw Bawm Kapaw na Garum; Myen Hpyen Atsuya Tsun
May 16, 2005

The Kachin Post

Mungkan hta n gun ja htum ai mungdan langai gaw lai wa sai bat hta Yangon mare kaw bawm kapaw na matu n’gun jaw garum ai lam, Myen hpyen atsuya dinglun dat ai hpe shiga dap ni hku chye lu ai.

“N’dai bawm gaw htingbu mungdan langai kaw maigan ninghkring ni hku n’na wunkat jaw let kapaw shangun ai re ai lam hte, bawm kapaw lu na matu n’gun ja ai mungdan kaba langai na mying gum hkawng ai uhpung langai kaw na garum ai re lam,” Myen hpyen atsuya a Shiga hkringmang Brigadier General Kyaw San gaw Laban shani hta galaw ai shiga salang poi hta tsun wa ai. Kyaw San hku n’na gara mungdan hte uhpung ngu n’na dingtawk mying n tsun ai raitim, shiga dap ni hku n’na gaw America mungdan hte Central Intelligence Agency, CIA, ni hpe tsun mayu ai re lam chye na nga ma ai. Htingbu mungdan ngu ai mung Thai mungdan hpe tsun mayu ai lam chye lu ai.

America mung Washington DC mare kaw rung jung ai uhpung langai mung Dr. Sein Win ningbaw ai Myen atsuya ninghkap hpung hpe US $100,000 garum jaw ai lam mung tsun da nga ai. Lai wa sai bat hta Yangon mare hta bawm kapaw ai hpang Myen hpyen atsuya gaw, Dr. Sein Win a National Coalition Government of hte Union of Burma, NCGUB, amyu sha rawtmalan hpung ni rai nga ai Karen National Union, KNU, Col Yord Serk ningbaw ai Shan State Army, SSA, hte Karenni National Progressive Party, KNPP, ni galaw ai magam re ngu mara shagun da nga ai.

Kyaw San matut tsun ai hta, bawm kapaw ai hpe All Burma Student Democratic Front, ABSDF, malawm Ko Ko San ngu ai wa ningbaw let ta-tut woi galaw ai re ai lam sang lang da nga ai. N’dai lam hte seng n’na, Ko Ko San ngu ai mying hte ABSDF malawm n nga ai hte ABSDF hku n’na Myen hpyen du ni hpe ninghkap nga ai raitim, n’dai zawn re ai mungchying sha ni hpe machyi hkra shangun ai laja lana ladat hpe galaw ai lam n nga ai ngu, ABSDF ningbaw Than Khe gaw BBC Myen shiga dap de tsun wa ai.

Yangon kaw bawm kabaw ai hta RDX yam hte kapaw ai hpe sagawn lu ai lam hte, RDX yam gaw Myen mung kaw galaw shapraw ai lam n ga ai hte n lang ai lam, Myen hpyen du ni a n’dau shabra laika hta ka da nga ai. RDX yam gaw maigan mungdan kaba hta shapraw n’na shanhte a hpyen dap kaw sha lang ai lam hte, htingbu mungdan hta mung lang ai lam chye lu ai, ngu n’na salang lang da nga ai.

Lai wa sai bat hta Yangon mare na shara 3 hta bawm kalang ta ngu na daram kawp ai majaw masha marai 11 si let, 160 jan hkala ai lam Myen atsuya shiga dap ni hku n’na n’dau da nga ai. Myen hpyen du ni mani bai n’dau ai jahpan hta gaw, marai 19 du hkra si ai lam chye lu ai.

Ya ten hta Myen atsuya hku n’na, Yangon kaw bawm kapaw ai hte seng n’na shiga lu tam jaw ai kadai hpe mung Myen gumhpraw 5,000,000 jaw na ngu n’dau da nga ai.