Yangon kaw Bawm 3 Lang Kapaw
May 8, 2005

The Kachin Post

Myen mung Yangon mare kaw mani Bawm 3 lang kapaw n’na masha marai 11 si let 160 jan hkala n’ba hkrum ai lam, AP Shiga hku chye lu ai.

May 7 ya shana de hking 2:50 kawn 3:00 lapran Yangon mare Mingala Taung Nyunt kaw galaw nga ai Thai Gun-rai madun poi, Mye Ni Kone kaw na Dagon Centre hte Mayan Gone na Junction 8 Centre hkan bawm kapaw mat ai rai nga ai.

Myen hpyen atsuya gaw amyu sha rawtmalan hpung ni rai nga ai Karen National Union, KNU, Col Yord Serk ningbaw ai Shan State Army, SSA, Karenni National Progressive Party, KNPP, hte National Coalition Government of the Union of Burma, NCGUB, ni galaw ai magam re ai lam mara shagun da nga ai. KNU hte SSA ni gaw kalang ta shanhte galaw ai n re lam ningdang da nga sai.

Bawm kapaw ai shara de Myen hpyen atsuya Hkringmang Daju Lt-Gen Soe Win hte Amu Madu I Lt-Gen Thein Sein ni kalang ta sa gawan yu ai lam chye lu ai.

Laiwa sai April 26 ya hta Mandalay mare Zaycho gat kaba kaw bawm kapaw ai majaw marai 2 si n’na 15 hkala mat sai rai nga ai. March 19 ya hta mung Yangon mare hta bawm kaji 2 kapaw mat sai rai nga ai.

Myen hpyen atsuya gaw Myen mung kata kaw bawm kapaw shagu kadai galaw ai hpe tup hkruk jep sagawn n lu ai shi tim, galoi mung amyu sha rawtmalan hpung ni hte maigan nga Democracy rawtmalan hpung ni hpe hkrai mara shagun ai rai nga ai.