Laknak Jahkrat N ra ai lam Mahtu Naw Tsun
May 5, 2005

The Kachin Post

Sam mung Kawng Hka mare kaw daju jung ai Kachin Defense Army, KDA, a ningbaw Du Kaba Mahtu Naw gaw Myen hpyen atsuya hpang de laknak jahkrat n ra ai lam, BBC Myen shiga dap de tsun wa ai.

“Laknak ap na hte seng n’na anhte mung n myit ai, shanhte [Myen hpyen atsuya] mung n tsun ai,” ngu Mahtu Naw tsun ai. “Laknak jahkrat na, matu nan n nga ai.”

Maigan na Myen shiga dap n’kau gaw, laiwa sai bat hta Myen hpyen atsuya hpang de laknak jahkrat mat wa ai Sam mung na gap hkat jahkring hpung Palaung State Liberation Army ngut ai hpang KDA hku n’na lak nak jahkrat sa wa na re ngu tsun jahta nga ma ai. Dai shagrin la n lu ai shiga hpe gara hku n mai byin ai lam Matu Naw ningdang dat ai.

Myen hpyen atsuya hku n’na Mung shawa de daru magam ap ya shaloi she KDA hku n’na gara hku tsap na ngu ai hpe dai aten hta she bawng ban ra na re lam hte Myen hpyen atsuya uphknag nga dingsa n’dai zawn pawng nga ra na re ngu, Mahtu Naw matut tsun wa ai.

Mahtu Naw woi awn ai KDA gaw 1990 ning hta kanu Wunpawng Mungdan Shanglawt Hpung, KIO, kawn htingbren pru let Myen hpyen atsuya hte gap hkat jahkring lam la mat n’na, Myen hpyen du ni woi galaw nga ai National Convention hpe 1993 ning kaw na 2005 ning du hkra shang lawm nga ai uhpung langai rai nga ai.

Ya ten hta, KDA gaw Myen hpyen atsuya n-pu na Ga Jarit sin Pyada dap langai hku tsap nga sai hte KDA malawm 850 daram hpe Myen hpyen atsuya kaw na shata shabrai hte kaga garum shingtau ai lam ni jaw nga ai re lam chye lu ai. KDA ningbaw Mahtu Naw hpe mung Pyada du langai hku masat da sai lam mung na lu ai.

KDA gaw Myen hpyen atsuya hte dingyang hpawng hpawm mat wa na re ai hte Myen hpyen ni a masha hku n’na tsap mat wa na re lam, Mahtu Naw tsun ai.