Sam Ningbaw ni hpe Rim sai Lam N’dau
March 17, 2005

The Kachin Post

Myen hpyen Atsuya gaw Sam ningbaw marai 10 hpe Myen mungdan ga garan wa na de shanawng ai hte Myen hpyen du ni gaw gap sa nga ai Mung Masa Lam Mastun 7 hpe jahten sharun ai lam galaw na matu uhpung langai hpaw ai majaw rim sai lam n’dau dat sai.

N’dau shabra ai lam hpe Myen hpyen atsuya a shiga hkringmang Brigadier-General Kyaw Hsan March 15 ya hta galaw ai shi laika bawng ban hpawng (press conference) hta shana dat ai rai nga ai.

Rim da hkrum ai Sam amyu sha ningbaw ni gaw Shan State Peace Council, SSPC, ningbaw Gen Hso Ten, Shan Nationalities League for Democracy, SNLD, Tingnyang Up Hkun Htun Oo hte Ninggawn Amu Madu Sai Nyunt Lwin, hte New Generation Shan State Party kaw na marai 4 lawm ai lam chye lu ai. Shanhte hpe February 8 hte 9 ya shani hkan Yangon hte Sam mung Taunggyi mare hta rim la hkrum ai rai nga ai. Raitim Myen hpyen du ni gaw ya she tara shang rim sai lam n dau dat ai rai nga ai.

Sam ningbaw ni rim da ai hpe dat ya na matu SSA-North a ningtau Tingnyang Up Col Sao Gaifa hku n’na Myen hpyen du ni hte jahkrup bawng ban yu tim, bungli n byin ai rai nga ai.

Brigadier-General Kyaw Hsan tsun ai hku rai yang, rim hkrum ai Sam ningbaw ni gaw 2004 ning December 22 ya hta Shan State Intellectuals Consultative Council (SSICC) hpe hpaw ninghtang tawn ai rai n’na, n’dai uhpung gaw Myen mung hpe mungdaw 8 hte gaw gap na masing jahkrat let Myen mung kaw na garan pru na maw mawn nga ai ngu mara shagun da nga ai. SSICC hta Shan State National Army, SSNA, and Shan United Revolutionary Army, SURA, ni mung lawm ai lam chye lu ai.

Sam gap hkat jahkring hpung Shan State Army-North, SSA-North, gaw Sam mung masa ningbaw ni hpe rim da ai kaw na n dat ya ai majaw National Convention n shang lawm ai sha ninghkap mat sai rai nga ai. Dai hte maren SNDL mung Aung San Suu Kyi a National League for Democracy party hte rau maning kawn National Convention hpe ninghkap da ai rai nga ai.