KNU hte Myen Hpyen Dap Hkrum Shaga
March 15, 2005

The Kachin Post

Myen Hpyen atsuya hpe ninghkap gasat nga ai Karen amyusha rawtmalan hpung Karen National Union, KNU, na dat kasa ni gaw Myen hpyen dap hte gap hkat jahring na matu hkrum shaga ai lam, Democratic Voice of Burma shiga hku chye lu ai.

KNU ningtau amu madu I Col Htoo Htoo Lay woi awn ai KNU dat kasa marai 13 gaw March 13 ya hta Myen mung Moulmein mare kaw du nga sai rai nga ai. N’dai lang na KNU dat kasa ni gaw shata 5 laman hta shawng ningnan lang ngu na Myen hpyen dap hte bai hkrum shaga ai ni rai nga ai.

N’dai lang hta madung bawng ban na lam gaw KNU hte Myen hpyen dap lapran majan kaji kajaw byin nga ai lam ni hpe shazim kau lu na matu re, ngu KNU ninggawn amu madu Phado Mahn Sha DVB shiga dap de tsun wa ai.

Ya ten, KNU hte Myen hpyen dap lapran hta ‘Gentleman Agreement’ ngu ai sha la da ai re majaw, shada naw gap hkat nga ai rai nga ai.

Lai wa sai 2004 ning October shata hta Col Htoo Htoo Lay woi awn ai KNU dat kasa ni Yangon mare de du sa sai raitim, dai aten hta Myen hpyen du shada shara kashaun hkat ai mang hkang byin wa n’na Hkringmang daju Gen Khin Nyunt hpe shara kawn shapraw kaw ai majaw KNU hte Myen hpyen dap gap hkat jahkring ai lam bawng ban na matu n mai byin mat ai rai nga ai.

2004 ning January shata hta KNU ningtau ningbaw Gen Bo Mya hte Myen Hkringmang Daju Gen Khin Nyunt ni uhpung lahkawng lapran tara shang gap hkat jahkring lam lu hkra bawng ban wa sai rai nga ai.

KNU gaw mungkan hta rawtmalan prat galu htum ai amyu sha lawt lu lam matu Myen atsuya ni hpe shaning 50 jan gasat nga ai mung masa hpung langai rai ng ai.