Sam Mung Gawng Malai Committee Hpaw
June 25, 2005

The Kachin Post

Sam mung a gawng malai tai na hte mung masa manghkang hpe mung masa lamyan hku hparan sa wa lu na matu Shan Representative Committee hpe Sam amyu sha uhpung 13 hku n’na madi shadaw gaw de dat sai lam, Shan Herald Agency for News shiga hku chye lu ai.

Shan Representative Committee, SRC, hpe June shata 18 ya hta rawtmalan ginra langai hta galaw ai zuhpawng kawn hpaw ninghtan dat ai rai nga ai. Dai zuphpawng hta Sam mung masa hpung ni hte mung shawa hte seng ai uhpung uhpawng ni a dat kasa marai 55 shanglawm bawngban ma ai rai nga ai. Dai zuphpawng hpe Restoration Council of Shan State, Shan State Army-South, Shan State National Army, Shan Democratic Union hte Shan Women’s Action Network zawn re ai Sam amyu sha uhpung kaba ni shang lawm ai.

Raitim, laiwa sai April 17 ya hta Sam Gumsan Magam Hso Kam Hpa ningbaw ai Sam Munghpawm atsuya a dat kasa ni gaw shang lawm ai lam n nga ma ai. June 18 ya na zuhpawng gaw Hso Kam Hpa atsuya Sam mung shanglawt n’dau ai hpang, Sam amyu sha ni a matu grai ahkak ai zuphpawng re lam hpe mung chye lu ai.

N’dai zuphpawng hta Sam amyu sha ni gaw Sam mung nga kaga hpu nau amyu sha ni hte rau mahkyin gumdin nga na matu mung dawdan ma ai.

Ya ten hta Sam amyu sha ni gaw Hso Kam Hpa Sam mung shanglawt n’dau ngut ai hpang, Myen hpyen atsuya lam amyu myu hku shamyit ai hpe hkam sha nga ai rai nga ai.