KNCD hte Amyu Sha Party ni Hkrum Bawngban
June 24, 2005

The Kachin Post

Kachin State National Congress for Democracy, KNCD, hte 1990 ning Myen mung ra-lata poi hta rapdaw shara awng dang da ai amyu sha party 7 gaw June 22 ya hta hkrum zuphpawng n’na, ya ten na byin nga ai Myen mung masa lam hte seng ai lam ni hpe bawngban ma ai lam, DVB shiga hku chye lu ai.

Yangon mare kaw galaw ai n’dai zuphpawng hta amyu sha party ni a ningbaw ni, dat kasa ni hte Min Ko Naing ningbaw ai Myen jawng ma ningbaw marai 8 gaw Yangon dakkasu makau na lu sha seng langai hta shana shat sha let hkrum bawngban ma ai rai nga ai.

Zuphpawng hta shang lawm ai amyu sha party ni yawng gaw United Nationalities Alliance, UNA, a malawm ni rai nga ai. UNA hpe Myen mung nga amyu sha yawng a gawng malai hku n’na mung masa lam tsun shaga ai ten hta shang lawm lu na matu yaw let 2002 ning hta Shan Nationalities League for Democracy party a ningbaw Hkum Htun Oo ningbaw let gaw de da ai rai nga ai. Raitim, 2005 ning February shata praw kawn Hkum Htun Oo gaw Myen hpyen atsuya a rim rawng hkrum nga sai rai nga ai.

United Nationalities Alliance a malawm party langai rai nga ai KNCD party gaw 1990 ning ralata poi hta Rapdaw shara 3 lata hkrum ai party rai nga ai.

Ya ten hta KNCD hpe Duwa Bawm Lang, Jinghpaw mung Jahpwi Lawhkawng ginwang KNCD rapdaw salang, woi awn nga ai rai n’na, Yangon mare KNCD dat kasa hku n’na gaw Mading Hkun Htoo hpe shatsam da ai rai nga ai.