United States of Southeast Asia Gawde Mai; Sam Gumsan Magam Tsun
June 17, 2005

The Kachin Post

Myen mung na amyu sha mungdaw 6 hte Sam mung pawng hpawn let United State of Southeast Asia, USSA, ngu ai mungdan ningnan langai gaw de mai ai lam, Sam mungdan Gumsan Magam Hso Kam Hpa tsun wa ai. N’dai lam hpe Hso Kam Hpa gaw Boxun News Network ngu ai Miwa shiga dap langai hte interview galaw ai shaloi htai da ai rai nga ai.

Hso Kam Hpa gaw laiwa sai April shata 17 ya hta Sam mung hpawm atsuya hpe gaw de let Sam mung shanglawt hpe n’dau dat sai rai nga ai. N’dai hku n’dau dat ai a majaw Myen hpyen atsuya hte Myen mung masa hpung malawng gaw a ging agang ninghkap, jahpoi mat wa sai rai nga ai.

Raitim, “Anhte[Sam mung] a shanglawt hpe shagrin n’na, hpu nau Arakan, Hkang, Jinghpaw, Karenni, Mon hte Karen ni hte rau United States of Southeast Asia, USSA, hpe gawde mai ai,” ngu Hso Kam Hpa Boxun News Network de tsun wa ai.

Sam mung dan rawtmalan n’dau dat ai hpang Myen hpyen dap a laja lana ladat hte Sam amyu sha ni hpe shamyit wa ai majaw, Sam mung dingdung na Sam mare masha hking lam gaw Thai mung ga jarit de hprawng makoi nga ra ai rai nga ai.

Dai hte maren Myen hpyen atsuya hte gap hkat jahring da ai Sam rawtmalan hpung ni hpe laknak jahkrat na grau n’na shadut wa ai rai nga ai. Dai majaw, May 21 ya hta Sam gap hkat jahkeng hpung langai rai nga ai Shan State National Army, SSNA, ningbaw Col Sai Ye gaw Myen hpyen atsuya hpe gasat nga ai Col Yawd Serk ningbaw ai Shan State Army-South, SSA-South, hte bai ta-gindun hpawng hpawn let Myen hpyen atsuya hpe ninghkap wa sai rai ngai.

SSA-South hte SSNA ni gaw Sam mung shanglawt n’dau ai lam hpe madi shadaw ai ngu shiga dap ni hkan tsun shaga ai lam n nga tim, kata lam hku n’na Sam amyu sha ni a myit mada nga ai shanglawt mungdan a matu Myen hpe gasat nga hpe chye lu ai.

“SSA-South hte SSNA pawng hpawn mat ai hpe myit shuk na lam hpa n nga ai, n’dai gaw Sam mung chying sha ni a nachying ra sharawng myit mada ai lam re,” ngu Gumsan Magam Hso Kam Hpa tsun ai.