Khin Nyunt hpe Jeyang ai Shiga Kabrawng
May 16, 2005

The Kachin Post

Myen hpyen atsuya a Hkringmang Daju Usa Khin Nyut hpe n’dai bat praw hta tara jeyang na matu hpang wa sai nga ai shi ga ni hpe maigan shiga dap ni hta amyu myu nga n’na tsun shaga nga ma ai.

AFP hte Reuter shiga dap ni a shiga hku rai yang, Khin Nyunt hpe n’dai bat langai ya shani hta Yangon mare na Tara rung daju hta tara jeyang hpang wa sai lam tsun da nga ai. Raitim, Kyodo shiga dap a shiga hta gaw Khin Nyunt hpe tara jeyang ai lam gaw n teng ai ngu n’na Tara rung daju na tara kasa kaba langai tsun ai hpe ka da nga ai.

Khin Nyunt hpe maning October shata hta hkam kaja lam n hkrat wa ai a majaw Hkringmang Daju shara kawn shapraw kau ai ngu Myen hpyen atsuya n’dau da ai rai nga ai. De hpang Khin Nyunt woi awn galaw nga ai Myen hpyen kaichyan dap ting hpe mung run kau let kaichyan magam gun tsa lam hpe rim rawng kau sai rai nga ai. Dai hta, Khin Nyunt a kam ram ai kaichyan du kaba 38 hpe tara n shang hpaga galaw ai lam ni a majaw tara jeyang n’na, htawng hta rim rawng da sai rai nga ai. Khin Nyunt a kasha Zaw Naing Oo hte Ye Naing Win ni hpe mung Insein htawng kata kaw tara jeyang nga sai rai nga ai.

Raitim, ya ten du hkra Khin Nyunt hpe hpa majaw magam gun kaw na dawm kau ai lam hpe Myen hpyen du ni gaw dan dan leng leng tengman ai hku n’dau ai lam n nga shi ai rai nga ai.

Laiwa sai Laban shani Yangon mare kaw galaw ai shiga sanglang poi hta Myen hpyen atsuya a shiga hkringmang Kyaw San gaw Khin Nyunt hpe tara jeyang nga ai ngu shiga pru nga ai hpe n teng ai lam tsun wa sai.

Khin Nyunt gaw 2003 ning August shata hta Myen hpyen atsuya a Hkringmang Daju byin tai wa n’na, Myen hpyen du ni a democracy mungdan gaw gap na mung masa lam matsun 7 hpe shawng ningnan n’dau wa ai rai nga ai.