JLH Myitkyina Dakkasu Ni a Laili Laika Hkaw Tsun Hpawng Galaw
July 25, 2005

Malihkrang Uma

Jinghpaw Wunpawng Laili Laika hte Htunghking Hpung Myitkyina Dakkasu ni a hta laili laika hkaw tusn hpawng hpe Myitkyina mare Shatapru manau wang gawknu kaw July 22 ya hta galaw wa sai.

N’dai hpawng hta anhte buga a makau grupyin lam, Aga masa labau lam hte htunghking maka lam ni hpe hkaw tsun ai rai n’na, Myitkyina mare na ramma ni, Myitkyina grup yin na ninghpum salang ni, Dakkasu Sara, Saranum ni hte Hpung Sara ni law law sa madat lawm ai lam chye lu ai.

Hkaw tsun hpawng hta Myitkyina Dakkasu Botany Department na Prof. Hpau Yam Bawk Ja gaw “Anhte a Ginra hpe Manu Chye Shadan Ga” ngu ai ga baw hte hkaw tsun n’na, Nawng Nang Chyum College na Prof. Rev. Maran Ja Gun hku n’na “Aga Masa Labau Ningmu” hte Sara Pungga Ja Li gaw “Wunpawng Sha ni a Htunghking Maka” ngu ai lam ni hpe hkaw tsun ai rai nga ai.

Prof. Hpau Yam Bawk Ja tsun ai hta, Jinghpaw mung gaw Panlawng Pan ni a daidaw shara rai nga ai hte maren anhte Buga a dingdung daw hta Panlawng Pan amyu 250 ram nga ai lam tsun wa. Japan mung na Tokyo University hku n’na Myitkyina Dakkasu Botany department hta matut let 2005 kawn 2009 laman hta buga kaw na nampu nampan hkum sumhpa ni hpe sa hkaja na lam hpe mung chye lu ai. Tsi-hkrung tsi-nan ni hpring chyat nga ai anhte a buga hpe Tsi company ni hku n’na mung myit shang sha nga ai lam matut tsun dan wa ai.

Prof Hpau Yam Bawk Ja gaw Jinghpaw Bumga shara shagu hte Hkyen Bum ni hkan du hkawm let ‘Pro-Ayeyawady Catchments Area’ ngu ai ga baw hte Ph.D. Janmau a matu lajang nga ai Saranum kaba langai rai n’na, ya Japan mungdan de mung sa du nhtawm, Tokyo University hte research jawm galaw na matu Myen mungdan a malai ga sadi lekmat htu da ai Saranum langai rai nga ai.

Rev. Maran Ja Gun hku n’na anhte Jinghpaw Wunpawng sha ni lang nga ai Ga-si Ga-ngau nig aw Asia dan hta nga ai amyu bawsang ni a Ga-ngau ginchyum ni re ai lam, Miwa amyu kaba ni pyi shanhte a labau sagawn yang Jinghpaw Wunpawng labau n lawm yang n ngut ai lam, tsun wa ai. Rev. Ja Gun gaw Thai mungdan na Payap Dakkasu kaw Linguistic hpaji hte Master Janmau lu da ai wa rai nga ai.

Kachin Institute of Culture and Arts jawng a hpaji up rai nga ai Sara Pungga Ja Li hkaw tsun ai hta, moi na anhte a Ji-woi Ji-wa ni shingra maka tara hpe atsawm sha chye na ai lam hte anhte a htunghking makam ni hta mung shingra tara hpe makawp maga da ail ma ni law law mu lu ai lam hpe chye lu ai. Matut n’na, dai zawn reng la ai htunghking ni hpe dai ni na ten hta shamat nga wa sai lam hte, anhte amyu sha ni jawjau lai wa sai ladat ni gaw ya anhte chye lu ai Hpanwa Ningsang Karai Kasang nan re ai lam hpe maumwi mausa ni hte sanglang dan wa sai.

Hkaw tsun hpawng hta sa du madat lawm ai ni mung ga san ni hpe kashun kashe rai n’na san htai galaw ai hte Dakkasu Jawngma ni a Jinghpaw Wunpawng yungwi ni hte shangwi shapyaw ya sai rai nga ai.