KIO/ KIA Dawm Kau ra sai lam Zahkung Ting Ying Tsun
February 28, 2005

La Grin

New Democratic Army-Kachin, NDA-K, ningbaw Du Kaba Zahkung Ting Ying gaw Jinghpaw Wunpawng amyu sha ni myit hkrum kahkyin gumdin lam lu na matu Wunpawng Mungdan Shanglawt Hpung hte Hpyen Dap, KIO/ KIA, hpe dawm kau ra sai lam tsun wa ai.

N’dai lam hpe Zahkung Ting Ying gaw February 25 ya shani Muse mare na shi a n’ta htingshawn shang chyu hpyi hpawng hta Muse mare na htunghking salang ni hpe tsun ai rai nga ai.

“KIO, KIA nga ai majaw amyu sha myit hkrum kahkyin gumdin lam n lu la sai, dai majaw KIO, KIA ngu ai mying hpe shaprai kau ra sai,” ngu Zahkung Ting Ying tsun wa ai hpe Muse na Salang wa bai tsun dan ai. “KIO/ KIA gaw lanyau kasha hte bung ai, naw kaji ai ten yawng e tsaw ra na zawn rai n’na, kaba wa yang shan sha wa, masha hpe amya wa ai hte maren sha re.”

Muse na Salang wa gaw Zahkung Ting Ying tsun ai hpe, “KIO gaw Sub-State [Sam Mung] ginra kaw n’na paw pru wa ai re majaw anhte a sai grai lawm nga ai, ra ai hta ra ai hku brang lang tsun shadum hkat ai hpe she ra sharawng ai, shatan ninghkan tsun jahpyak jahpoi ai hpe kachyi mung n ra sharawng ai,” ngu tsun wa ai.

Zahkung Ting Ying a Muse mare na n’ta gaw Myen gumhpraw sen 400 jan hte gaw gap da ai rai n’na dai hta masha law law shang ai zuphpawng gawk langai mung lawm ai lam, htingshawn shang poi de du sa ai Salang wa tsun ai.

Zahkung Ting Ying gaw 2004 ning praw hta KIO kawn htingbren pru mat ai Du Kaba Lasang Awng Wa hpung ni hpe Pang Wa mare kaw shara jaw let shamu shamawt na ahkang jaw da ai rai nga ai. 2004 ning December 10 ya hta shi a Mawdaw hpe bawm hte kapaw hkrum ai hpang KIO hpe ninghkap ai lam a’dan a’leng galaw hpang wa sai rai nga ai. Shi hpe bawm hte kapaw ai lam hte seng n’na mung KIO kaw lit nga ai lam dinglun da sai rai nga ai.