Myitkyina na Gat Seng Madu ni Jam Jau
February 23, 2005

Put Sha/ Myitkyina

Jinghpaw Mung Myitkyina mare na uphkang du ni a masing hte maren Wanleng daru makau na gat seng ni hpe run kau sa na re majaw gat seng madu ni jam jaw nga ai lam chye lu ai.

Uphkang du ni hku n’na gat seng madu ni hpe seng htawt jarik Myen gumhpraw 10,000 Kyat sha jaw ai majaw seng madu ni hku n’na ram ram jam jau nga ai lam seng madu langai tsun wa ai. Ngut n’na, gat seng madu ni gaw madang tsaw ai hku bai gaw gap na gat seng ningnan ni hpe manu jahpu grau law ai hte bai mari la ra ai rai nga ai.

Wanleng daru makau na Gat seng 80 jan hpe lai wa sai January shata htum kawn run kau n’na ningnan gaw gap na matu masing jahkrat sai raitim, gat seng madu ni ninghkap ai majaw March shata hpang jahtum tawn let htawt sit ya ra ai lam bai matsun wa sai.

Ya ten hta Myitkyina mare hta gat seng ningnan grai gaw gap nga ai ten re majaw, Mungdaw Gin Sup Pa makau a sinpraw maga grup hkra Ye Mon Company ni lit la let seng ningnan ni hpe gaw gap nga ai rai nga ai. Dai shara na gat seng langai mi hpe Myen gumhpraw sen 150 hte dut nga ai lam chye lu ai.

Wanleng daru a jahtum maga hta mung htap lahkawng re ai seng gawk ni gaw gap da ngut sai rai n’na, seng kaba ni hpe dut nga sai lam chye lu ai.